اچھی نیند پیٹ کی چربی گھٹانے اور چھاتی کے کینسر کے خطرے میں کمی کا سبب بن سکتی ہے: تحقیق

ماہرینِ صحت کے مطابق معیاری اور مکمل نیند لینے سے جسم میں پیٹ کے گرد جمع ہونے والی چربی کم ہوتی ہے، جس کے نتیجے میں خواتین میں چھاتی کے کینسر کے خطرات میں نمایاں کمی آ سکتی ہے۔

حالیہ تحقیق سے معلوم ہوا ہے کہ خواتین میں بریسٹ کینسر کے اہم اسباب میں خراب نیند، مسلسل ذہنی دباؤ اور پیٹ کے اردگرد چربی شامل ہیں۔

 ماہرین کا کہنا ہے کہ طرزِ زندگی اور میٹابولک تبدیلیاں اب اس بیماری کے خطرات کو نئی شکل دے رہی ہیں، جس کے باعث کم عمر خواتین بھی متاثر ہو رہی ہیں۔

تحقیق میں عالمی تحقیقی اداروں کے ڈیٹا کو شامل کیا گیا، جس سے یہ بات سامنے آئی کہ ناقص نیند اور جسم کی اندرونی حیاتیاتی گھڑی میں بگاڑ چھاتی کے کینسر کے بڑھتے ہوئے خطرے سے جڑا ہوا ہے۔

ماہرین کے مطابق نیند کی کمی میلٹونن ہارمون کے اخراج، ایسٹروجن کے توازن، مدافعتی نظام کی کارکردگی اور ڈی این اے کی مرمت کے قدرتی عمل کو متاثر کرتی ہے۔

 اگرچہ خراب نیند اکیلا سبب نہیں، لیکن جب اس کے ساتھ موٹاپا، دائمی اسٹریس، جسمانی غیرفعالیت اور سست طرزِ زندگی شامل ہو جائیں تو بیماری کا خطرہ کئی گنا بڑھ جاتا ہے۔

ماہرین کا کہنا ہے کہ اگرچہ عمر اور جینیاتی عوامل سب سے مضبوط اور ناقابلِ تبدیل خطرات ہیں، تاہم خراب نیند اب ایک اہم قابلِ اصلاح (modifiable) عنصر کے طور پر سامنے آ رہی ہے۔

 طبی مشاہدات کے مطابق طویل عرصے تک نیند کی کمی، نائٹ شفٹ میں کام، ذہنی دباؤ اور میٹابولک مسائل کے بعد خواتین میں بریسٹ کینسر کی شرح بڑھ جاتی ہے۔