سپریم لیڈر پر حملہ پوری اسلامی دنیا کے خلاف جنگ تصور ہوگا: ایران

تہران: ایرانی قیادت نے دو ٹوک مؤقف اختیار کرتے ہوئے کہا ہے کہ سپریم لیڈر آیت اللہ علی خامنہ ای کو نشانہ بنانا پوری اسلامی دنیا کے خلاف جنگ کے مترادف ہوگا۔

ایرانی حکام نے سپریم لیڈر کے خلاف کسی بھی ممکنہ کارروائی پر سخت ردعمل دیتے ہوئے امریکا کو سنگین نتائج کی وارننگ دی ہے۔

ایرانی قومی سلامتی کمیشن کے مطابق اگر سپریم لیڈر پر حملہ ہوا تو علما جہاد کا فتویٰ جاری کریں گے اور دنیا بھر میں ردعمل سامنے آئے گا۔

قومی سلامتی اور خارجہ پالیسی کمیشن نے اپنے بیان میں کہا کہ دنیا بھر میں موجود اسلام کے سپاہیوں کے کسی بھی ردعمل کی ذمہ داری آیت اللہ خامنہ ای پر حملہ کرنے والوں پر عائد ہوگی۔

اس سے قبل ایرانی صدر بھی واضح کر چکے ہیں کہ سپریم لیڈر پر کوئی بھی حملہ مکمل اور ہمہ گیر جنگ کا باعث بنے گا۔

 انہوں نے خبردار کیا کہ اس کے اثرات صرف خطے تک محدود نہیں رہیں گے بلکہ عالمی سطح پر عدم استحکام پیدا ہو سکتا ہے۔