پاکستان نے غزہ میں پائیدار امن کے لیے ’بورڈ آف پیس‘ میں شمولیت قبول کرلی

پاکستان نے غزہ میں پائیدار امن قائم کرنے کے لیے ’بورڈ آف پیس‘ میں شمولیت کی دعوت قبول کرلی ہے۔

دفترِ خارجہ کے ترجمان نے تصدیق کی کہ امریکی صدر ڈونلڈ ٹرمپ کی جانب سے وزیراعظم شہباز شریف کو اس بورڈ میں شامل ہونے کی دعوت دی گئی تھی، جسے پاکستان نے قبول کر لیا۔

 ترجمان کے مطابق پاکستان نے اقوام متحدہ کی سلامتی کونسل کی قرارداد 2803 کے تحت غزہ امن منصوبے کی حمایت کا اعلان کیا ہے، جبکہ بورڈ کا مقصد مستقل جنگ بندی کے لیے عملی اقدامات کرنا ہے۔

پاکستان نے فلسطینی عوام کے لیے انسانی امداد میں اضافے کی ضرورت پر زور دیا اور فلسطینی عوام کے حقِ خودارادیت کی بھرپور حمایت کا اعادہ کیا۔ 

ترجمان نے کہا کہ پاکستان آزاد، خودمختار فلسطینی ریاست کے قیام کے حق میں ہے جو 1967 کی سرحدوں پر مشتمل ہو اور اس کا دارالحکومت القدس الشریف ہو۔

دفتر خارجہ نے کہا کہ پاکستان فلسطینی عوام کے دکھ درد کے خاتمے کے لیے تعمیری کردار ادا کرتا رہے گا اور بورڈ آف پیس کے پلیٹ فارم سے امن کے لیے عملی پیش رفت کی امید ہے۔

بین الاقوامی خبررساں ایجنسی کے مطابق ٹرمپ کی سربراہی میں قائم اس بورڈ میں مستقل نشست کے لیے ایک ایک ارب ڈالر فیس مقرر کی گئی ہے۔ 

ابتدائی طور پر بورڈ کا مقصد غزہ کی بحالی کے امور پر توجہ دینا تھا، تاہم چارٹر میں اس کے دائرۂ کار کو صرف غزہ تک محدود نہیں کیا گیا اور یہ اقوام متحدہ کا متبادل یا حریف ادارہ بھی بننے کی کوشش کر سکتا ہے۔