ٹی 20 ورلڈ کپ؛ پی سی بی نے بنگلہ دیش کی حمایت میں خط کی خبروں سے لاعلمی ظاہر کر دی

پاکستان کرکٹ بورڈ (پی سی بی) نے بنگلہ دیش کے موقف کی حمایت میں آئی سی سی کو خط لکھے جانے کی خبروں سے لاعلمی ظاہر کی ہے۔

پی سی بی کے ترجمان نے کہا کہ بورڈ کو اس معاملے کا کوئی علم نہیں اور یہ بات انہیں میڈیا سے ہی معلوم ہوئی۔

ادھر میڈیا رپورٹس میں دعویٰ کیا گیا کہ پی سی بی نے بنگلہ دیش کے حتمی فیصلے سے ایک روز قبل آئی سی سی کے دیگر اراکین کو خط بھیجا اور بی سی بی کے موقف کی حمایت کی۔ 

خط میں کہا گیا کہ خطے میں سیاسی کشیدگی کے پیش نظر بنگلہ دیش کا بھارت میں میچز نہ کھیلنے کا فیصلہ قابل فہم ہے۔

ذرائع کے مطابق یہ خط پی سی بی نے آئی سی سی کے دیگر ممبران کو بھی ارسال کیا۔

آئی سی سی بدھ کو بورڈ اجلاس طلب کر رہی ہے، جس میں بنگلہ دیش کی سیکیورٹی خدشات کی بنیاد پر میچز سری لنکا منتقل کرنے کی درخواست پر غور کیا جائے گا، حالانکہ بھارت اس ایونٹ کا مشترکہ میزبان ہے۔

 یہ واضح نہیں کہ آیا پی سی بی کے خط کے بعد یہ اجلاس بلایا گیا یا پہلے سے طے شدہ تھا۔

آئی سی سی اب بھی اپنے موقف پر قائم ہے اور شیڈول میں تبدیلی یا بنگلہ دیش کو سری لنکا میں کھیلنے کی اجازت دینے کے حق میں نہیں ہے۔

 بنگلہ دیش کی حکومت بی سی بی کے بھارت نہ جانے کے فیصلے کی حمایت جاری رکھے ہوئے ہے۔

دونوں فریقین کے درمیان متعدد ملاقاتیں ہو چکی ہیں، جن میں حالیہ ملاقات ڈھاکہ میں ہوئی، مگر کسی پیش رفت کے بغیر 21 جنوری کو فیصلے کی آخری تاریخ مقرر کی گئی تھی۔

یہ تنازع اس وقت شروع ہوا جب بھارتی بورڈ نے آئی پی ایل 2026 کے لیے کولکتہ نائٹ رائیڈرز کو مصطفیض الرحمان کو اسکواڈ سے نکالنے کی ہدایت دی تھی۔