لاہور میں ماں بچی کے سیوریج میں گرنے کے واقعے پر انکوائری، ایس پی اور ایس ایچ او خاتون کے شوہر پر تشدد کے ملزم قرار
لاہور میں ماں اور بچی کے سیوریج لائن میں گر کر جاں بحق ہونے کے واقعے سے متعلق پولیس انکوائری رپورٹ میں ایس پی سٹی بلال اور ایس ایچ او بھاٹی زین کو خاتون کے شوہر غلام مرتضیٰ پر تشدد کا ذمہ دار قرار دے دیا گیا ہے۔
یہ رپورٹ ایڈیشنل آئی جی عمران محمود، ڈی آئی جی ناصر عزیز ورک اور ڈی آئی جی عمران کشور پر مشتمل انکوائری کمیٹی نے تیار کی۔
رپورٹ کے مطابق پولیس افسران غلام مرتضیٰ کو موقع سے تھانہ بھاٹی لے گئے اور دیگر رشتہ داروں سے تفتیش کے بجائے فوری طور پر جاں بحق خاتون کے والد سے رابطہ کیا۔
انکوائری میں بتایا گیا کہ غلام مرتضیٰ اور اس کے رشتہ دار تنویر کو تھانے میں بٹھایا گیا، جہاں ایس ایچ او کے کمرے میں غلام مرتضیٰ پر تشدد کیا گیا۔
تھانے میں نصب کیمروں کی فوٹیج سے بھی شواہد حاصل کیے گئے، جبکہ غلام مرتضیٰ کو تقریباً پونے پانچ گھنٹے غیر قانونی حراست میں رکھا گیا۔
غلام مرتضیٰ نے بیان دیا کہ پولیس افسران اس پر بیوی اور بیٹی کے قتل کا الزام قبول کرنے کے لیے دباؤ ڈالتے رہے، جبکہ ملزم افسران کا موقف تھا کہ ریسکیو اور دیگر اداروں کی رائے پر شبے کی بنیاد پر اسے حراست میں لیا گیا۔
رپورٹ میں دونوں افسران کی جانب سے واقعے کو غیر پیشہ ورانہ انداز میں ہینڈل کرنے کی نشاندہی کرتے ہوئے ان کے خلاف محکمانہ کارروائی کی سفارش کی گئی ہے۔
رپورٹ آئی جی پنجاب کو پیش کر دی گئی ہے، جو اسے وزیراعلیٰ کو ارسال کریں گے۔
