مصدق ملک: صاف پانی میں غلاظت پھینکی جا رہی ہے اور وہی پانی سب پی رہے ہیں

اسلام آباد: وفاقی وزیر موسمیاتی تبدیلی ڈاکٹر مصدق ملک نے خبردار کیا ہے کہ صاف پانی میں فضلہ اور آلودگی شامل کی جا رہی ہے، اور وہی پانی سب استعمال کر رہے ہیں۔

آبی ذخائر کے عالمی دن کے موقع پر منعقدہ خصوصی تقریب سے خطاب کرتے ہوئے ڈاکٹر مصدق ملک نے کہا کہ ماحول کا تحفظ ہم سب کی مشترکہ ذمہ داری ہے۔

 انہوں نے کہا کہ ہمارا سیارہ زندگی کے لیے تمام وسائل فراہم کرتا ہے، جن میں نباتات اور جنگلی حیات بھی شامل ہیں، جو انسانی زندگی کے لیے نہایت اہم ہیں۔

انہوں نے کہا کہ انسان کی سرگرمیاں قدرت کو نقصان پہنچا رہی ہیں اور اس پر قابو پانا ضروری ہے۔ “صاف پانی میں بڑی مقدار میں فضلہ ڈالا جا رہا ہے، اور وہی پانی سب پی رہے ہیں۔”

وفاقی وزیر نے کہا کہ فضائی اور آبی آلودگی موجودہ دور کے بڑے مسائل ہیں اور ماحولیاتی تبدیلی سے نمٹنے کے لیے فوری اقدامات ضروری ہیں۔

 انہوں نے پرندوں کی نقل مکانی کا حوالہ دیتے ہوئے کہا کہ اسلام آباد اور لاہور میں نئی آبادیاں اکثر قدرتی راستوں کو متاثر کر رہی ہیں۔

انہوں نے چھوٹے ڈیمز بنانے کی ضرورت پر زور دیا اور اعلان کیا کہ آئندہ دو سال میں ٹریٹمنٹ پلانٹس لگائے جائیں گے۔ فضلہ کو ٹھکانے لگانے کا مؤثر طریقہ بھی تیار کیا جائے گا۔

وزیر نے مزید کہا کہ کئی قدرتی جھیلوں کے کنارے بدبو اور تعفن موجود ہے، جسے ختم کیا جائے گا۔ انہوں نے کہا: “یہ صرف جھیلیں اور کشتییں نہیں، بلکہ زندگی گزارنے کا ایک اہم ذریعہ ہیں۔”