26 نومبر احتجاج کیس: علیمہ خان کے ناقابلِ ضمانت وارنٹ گرفتاری جاری

اسلام آباد کی انسدادِ دہشتگردی عدالت نے 26 نومبر کے احتجاج سے متعلق کیس میں علیمہ خان کے ناقابلِ ضمانت وارنٹِ گرفتاری جاری کر دیے ہیں۔

عدالت میں سماعت کے دوران علیمہ خان کی جانب سے حاضری سے استثنیٰ کی درخواست دائر کی گئی، تاہم عدالت نے یہ درخواست مسترد کرتے ہوئے ان کی گرفتاری کے احکامات جاری کر دیے۔

عدالتی حکم کے مطابق علیمہ خان کو گرفتار کر کے کل تک عدالت میں پیش کیا جائے۔ 

عدالت نے یہ بھی ہدایت دی ہے کہ ملزمہ کی پیشی تک ان کے بینک اکاؤنٹس اور قومی شناختی کارڈ کو بلاک رکھا جائے۔

سماعت کے دوران اسپیشل پراسیکیوٹر ظہیر شاہ نے مؤقف اختیار کیا کہ ملزمہ عدالت کو ہدایات نہیں دے سکتیں اور ابتدا سے ہی ان کا رویہ غیر ذمہ دارانہ رہا ہے۔