بسنت، عدلیہ اور عمران خان کی صحت: علیمہ خان کے اہم بیانات

بانی پاکستان تحریک انصاف عمران خان کی بہن علیمہ خان نے کہا ہے کہ لاہور میں بسنت کی تقریبات عمران خان کی وجہ سے ممکن ہو رہی ہیں اور بسنت کے دن آسمان بانی پی ٹی آئی کی پتنگوں سے بھرا نظر آئے گا۔

راولپنڈی میں میڈیا سے گفتگو کرتے ہوئے علیمہ خان نے عدالتی کارروائی پر تشویش ظاہر کی اور کہا کہ ججوں کی حالت بے بسی کی عکاس ہے اور انہیں معلوم ہے کہ سزا سنانا ہی مقدر ہے۔ 

انہوں نے الزام لگایا کہ غریب پولیس اہلکاروں کو عدالت میں جھوٹا بیان دینے پر مجبور کیا جا رہا ہے اور عوام کو عدلیہ سے انصاف کی توقع کے بجائے پیغام مل رہا ہے کہ موجودہ نظام میں عوام کی امید کی کوئی گنجائش نہیں۔

علیمہ خان نے کہا کہ تمام پارلیمنٹیرینز کے اجلاس بلائے گئے ہیں تاکہ لائحہ عمل تیار کیا جا سکے۔ 

عمران خان کی صحت کے حوالے سے انہوں نے مطالبہ کیا کہ ڈاکٹر عاصم یوسف ان کا میڈیکل چیک اپ کریں، کیونکہ شناختی کارڈ بلاک ہونے کی وجہ سے وہ عدالت میں پٹیشن نہیں دائر کر سکتی۔

انہوں نے کہا کہ فیملی کو ابھی تک عمران خان کی میڈیکل رپورٹ نہیں ملی، اور بیرسٹر گوہر خان سے بات کے بعد واضح ہوا کہ بانی کی ایک آنکھ دو ہفتے تک دھندلی رہی۔ 

علیمہ خان نے کہا کہ وہ چاہتے ہیں کہ بانی کا معائنہ ان کے ذاتی ڈاکٹر کریں۔

علیمہ خان نے یہ بھی کہا کہ 8 فروری سے توجہ ہٹانے کی بھرپور کوشش کی جا رہی ہے، اور ان کی بیرون ملک جانے اور فنڈ ریزنگ کی درخواستیں عدالت نے مسترد کر دی ہیں۔ 

انہوں نے مزید کہا کہ عمران خان ہمیشہ اپنی طبیعت کے مسائل کو ہلکا لیتے ہیں۔