رجنی کانت نے صفائی کرنے والی خاتون کی ایمانداری پر سونے کی چین سے نوازا

بھارتی سپر اسٹار رجنی کانت نے ایک صفائی کرنے والی خاتون کو اس کی ایمانداری پر سونے کی چین کا تحفہ دیا۔ 

میڈیا رپورٹس کے مطابق گزشتہ ماہ چنئی میں ایک مندر کے قریب سڑک کی صفائی کے دوران پدما نامی خاتون نے طلائی زیورات سے بھرا ایک بیگ اٹھایا اور فوری طور پر پولیس کے حوالے کر دیا۔

پولیس نے زیورات کے مالک کو تلاش کر کے بیگ واپس کر دیا اور پدما کی ایمانداری کے اعتراف میں تامل ناڈو کے وزیر اعلیٰ نے اسے ایک لاکھ بھارتی روپے کا انعام دیا۔

اس خبر سے متاثر ہو کر جنوبی ہندی فلم انڈسٹری کے سپر اسٹار رجنی کانت نے پدما سے اپنی رہائش گاہ پر ملاقات کی اور اس کی ایمانداری کے اعتراف میں سونے کی چین کا تحفہ دیا۔ 

اداکار کی ٹیم نے اس موقع کی تصاویر سوشل میڈیا پر شیئر کیں، جس پر مداحوں نے رجنی کانت اور پدما دونوں کی تعریف کی۔