ابرارالحق کی خاتون صحافی سے بدتمیزی، ویڈیو سوشل میڈیا پر وائرل

لندن: پاکستانی گلوکار Abrar-ul-Haq ایک بار پھر سوشل میڈیا پر وائرل ہونے والی ویڈیو کے باعث خبروں میں آگئے ہیں۔ 

اس نئی ویڈیو میں وہ ایک خاتون صحافی Safina Khan سے ڈونیشن سے متعلق معاملے پر بحث کرتے نظر آ رہے ہیں۔

ویڈیو میں دیکھا جا سکتا ہے کہ ابرارالحق صحافی پر یہ الزام عائد کرتے ہیں کہ وہ وائرل ویڈیوز کے ذریعے شہرت حاصل کرنا چاہتی ہیں، جبکہ صحافی نے مؤقف اختیار کیا کہ وہ اس کنسرٹ میں موجود ہی نہیں تھیں اور وائرل ویڈیو ابرارالحق کی اپنی ٹیم کے افراد نے شیئر کی تھی۔

سفینہ خان کے مطابق انہوں نے وضاحت دینے کی کوشش کی مگر ابرارالحق بات سننے کو تیار نہیں تھے۔ 

دورانِ گفتگو ابرارالحق نے سفینہ خان سمیت دیگر صحافیوں کو ن لیگ کا حامی بھی قرار دیا۔

ڈونیشن کے معاملے پر وضاحت دیتے ہوئے ابرارالحق کا کہنا تھا کہ انہوں نے اپنی ذاتی رقم سے زمین خرید کر ہسپتال تعمیر کیا اور کنسرٹ کے دوران ملنے والی رقم اسی ہسپتال کے لیے عطیہ تھی۔ 

ان کے مطابق کنسرٹ کے دوران فوری طور پر بینک میں رقم جمع کروانا ممکن نہیں تھا، اس لیے انہوں نے پیسے جیب میں رکھ لیے۔

یہ ویڈیو مختلف کیپشنز کے ساتھ سوشل میڈیا پر تیزی سے وائرل ہو رہی ہے، جہاں کچھ صارفین ابرارالحق کے مؤقف کی حمایت کر رہے ہیں جبکہ دیگر افراد اس رویے کو نامناسب اور انا کا مسئلہ قرار دے رہے ہیں۔

واقعے کے بعد سفینہ خان نے ایک اور ویڈیو بھی شیئر کی جس میں وہ اور ابرارالحق خوشگوار انداز میں گفتگو کرتے دکھائی دیتے ہیں، جس سے ظاہر ہوتا ہے کہ دونوں کے درمیان غلط فہمی بعد ازاں ختم ہو گئی۔