دو کھلاڑیوں کے ورلڈ کپ کے فوری بعد انجری کا سبب معلوم کرنے کے لیے تحقیقات: عاقب جاوید

پاکستان کرکٹ بورڈ کے ڈائریکٹر ہائی پرفارمنس عاقب جاوید نے ٹی ٹوئنٹی ورلڈ کپ میں ٹیم کی کارکردگی پر مایوسی کا اظہار کیا۔ 

لاہور میں پریس کانفرنس کے دوران انہوں نے کہا کہ ٹیم سے زیادہ توقعات تھیں، سیمی فائنل تک پہنچنے کی امید تھی، لیکن ٹیم وہ کارکردگی نہیں دکھا سکی جو ہونی چاہیے تھی۔

عاقب جاوید نے بتایا کہ 20 کھلاڑیوں کو دیکھا گیا تاکہ مناسب کمبی نیشن منتخب کی جا سکے، لیکن پلیئنگ الیون کے حتمی انتخاب کے لیے کوچ کو آزادی دی جانی چاہیے تھی۔ 

انہوں نے تصدیق کی کہ بابر اعظم اور فخر زمان انجری کے شکار ہیں اور بنگلہ دیش سیریز میں شامل نہیں ہوں گے۔ 

پی سی بی اس بات کی تحقیقات کرے گا کہ یہ دونوں کھلاڑی ورلڈ کپ کے فوری بعد کیسے انجری کا شکار ہوئے، اور یہ معلوم کرے گا کہ آیا یہ انجری ایونٹ کے دوران ہوئی تھی۔

انہوں نے واضح کیا کہ پلیئنگ الیون کا حتمی فیصلہ کپتان اور کوچ کا حق ہے، اور ہر اسٹیک ہولڈر کو اپنی ذمہ داری قبول کرنی چاہیے۔ 

عاقب جاوید نے 2009ء کے بعد کرکٹ کی ترقی نہ ہونے پر بھی تشویش کا اظہار کیا اور کہا کہ ہر ہار کے بعد رد عمل میں تبدیلیاں کرنے کے بجائے اسٹریٹجک اقدامات کی ضرورت ہے۔