آسکر ایوارڈز 2029 میں بڑی تبدیلیاں متوقع

فلمی دنیا کے سب سے بڑے ایوارڈ آسکر ایوارڈز ایک نئے دور میں داخل ہونے جا رہے ہیں، جہاں 2029 سے تقریب کے مقام اور نشریاتی نظام میں نمایاں تبدیلیاں متوقع ہیں۔

رپورٹس کے مطابق، کئی سالوں تک یہ تقریب ڈولبی تھیٹر، لاس اینجلس میں منعقد ہوتی رہی ہے، لیکن 2029 سے اسے شہر کے ڈاؤن ٹاؤن میں واقع ایل اے لائیو منتقل کیا جائے گا، جو ایک وسیع اور جدید مقام ہے۔

نئی جگہ پر ریڈ کارپٹ، مرکزی اسٹیج، میڈیا کوریج اور آفٹر پارٹیز سب ایک ہی مقام پر منعقد ہو سکیں گی، جس سے تقریب کو زیادہ منظم اور شاندار بنانے میں مدد ملے گی۔ 

موجودہ تھیٹر جس میں تقریب ہوگی، اسے اس وقت پیکاک تھیٹر کہا جاتا ہے، تاہم امکان ہے کہ مستقبل میں اس کا نام بدل دیا جائے۔

اس تبدیلی کے تحت شائقین اور مہمانوں کے لیے زیادہ جگہ مختص کی جائے گی، تاکہ زیادہ افراد اس پرتعیش تقریب کو قریب سے دیکھ سکیں۔

مزید برآں، 2029 سے آسکر ایوارڈز کو ڈیجیٹل پلیٹ فارم پر بھی نشر کیا جائے گا۔

 تقریب دنیا بھر میں مفت یوٹیوب پر دستیاب ہوگی، جبکہ امریکا میں یہ یوٹیوب ٹی وی پر بھی نشر کی جائے گی۔