کم عمر بچوں کے سوشل میڈیا استعمال پر پابندی کی منظوری

آسٹریا نے ملک بھر میں 14 سال سے کم عمر بچوں کے سوشل میڈیا استعمال پر پابندی کی منظوری دے دی ہے۔

میڈیا رپورٹس کے مطابق نائب چانسلر نے پریس کانفرنس میں کہا کہ سوشل میڈیا پلیٹ فارمز نوجوانوں پر منفی اثرات ڈال رہے ہیں، اسی لیے عمر کی حد مقرر کرنا ضروری ہے، جیسا کہ دیگر حساس مواد کے لیے کیا جاتا ہے۔

انہوں نے بتایا کہ یہ پابندی قومی سطح پر نافذ کی جائے گی، جبکہ آسٹریا یورپی یونین میں بھی ایسے اقدامات کو فروغ دینے کی کوشش کرے گا۔

تعلیمی اصلاحات کے تحت 2027-28 کے تعلیمی سال سے اعلیٰ ثانوی سطح پر میڈیا لٹریسی کو باقاعدہ مضمون بنایا جائے گا۔ 

اس کے ساتھ ساتھ انفارمیٹکس کی تعلیم کو بھی وسعت دی جائے گی، جس میں مصنوعی ذہانت (AI) شامل ہوگی تاکہ طلبہ ڈیجیٹل دنیا کو بہتر طور پر سمجھ سکیں اور اس کے خطرات و مواقع کو پہچان سکیں۔

یہ اقدام دنیا بھر میں کم عمر بچوں کے سوشل میڈیا استعمال کو محدود کرنے کے بڑھتے ہوئے رجحان کا حصہ ہے۔