امریکی ایوانِ نمائندگان نے ایران سے جنگ کے معاملے پر ٹرمپ کے اختیارات محدود کرنے کی قرارداد منظور کر لی

ایران کے ساتھ ممکنہ جنگی کارروائی کے معاملے پر امریکی ایوانِ نمائندگان نے صدر ڈونلڈ ٹرمپ کے اختیارات محدود کرنے کی قرارداد منظور کر لی ہے۔

قرارداد کے حق میں 215 جبکہ مخالفت میں 208 ووٹ آئے۔ یہ قرارداد ڈیموکریٹک پارٹی کی جانب سے پیش کی گئی تھی، جبکہ چار ریپبلکن ارکان نے بھی ڈیموکریٹس کا ساتھ دیتے ہوئے اس کے حق میں ووٹ دیا۔

منظور شدہ قرارداد کے مطابق ایران کے خلاف کسی بھی جنگی کارروائی کے لیے کانگریس کی پیشگی منظوری ضروری ہوگی اور صدر کانگریس کی منظوری کے بغیر ایسی کارروائی کا آغاز نہیں کر سکیں گے۔

یہ اقدام ایسے وقت میں سامنے آیا ہے جب امریکا اور ایران کے درمیان کشیدگی میں اضافہ دیکھا جا رہا ہے اور خطے کی صورتحال عالمی توجہ کا مرکز بنی ہوئی ہے۔

قرارداد کو صدر کے جنگی اختیارات پر کانگریس کی نگرانی مضبوط بنانے کی کوشش قرار دیا جا رہا ہے۔