امریکا:سکائی ڈائیونگ ٹیم کا طیارہ گر کر تباہ،12افراد ہلاک

امریکی ریاست میسوری میں اسکائی ڈائیونگ ٹیم کا طیارہ گر کر تباہ ہو گیا، حادثے میں جہاز میں سوار تمام 12 افراد جان کی بازی ہار گئے۔

غیر ملکی میڈیا رپورٹس کے مطابق امریکی ریاست میسوری کے شہر کینساس کے قریب واقع بٹلر میموریل ایئرپورٹ پر ایک طیارہ پرواز کے فوری بعد حادثے کا شکار ہو کر گر گیا۔

حکام کے مطابق حادثے کا شکار ہونے والے طیارے میں ایک پائلٹ اور 11 اسکائی ڈائیورز سوار تھے، جو حادثے کے نتیجے میں ہلاک ہو گئے۔

بیٹس کاؤنٹی پولیس کے ایک افسر کے مطابق حادثہ مقامی وقت کے مطابق دن تقریباً ساڑھے 11 بجے پیش آیا۔

حادثے کے فوراً بعد میسوری اسٹیٹ ہائی وے پیٹرول، فیڈرل ایوی ایشن ایڈمنسٹریشن (FAA) اور نیشنل ٹرانسپورٹیشن سیفٹی بورڈ (NTSB) کی ٹیمیں موقع پر پہنچ گئیں اور واقعے کی تحقیقات کا آغاز کر دیا گیا۔

حکام نے حادثے کی وجوہات سے متعلق تاحال کوئی حتمی بیان جاری نہیں کیا، جبکہ تحقیقات مکمل ہونے کے بعد مزید تفصیلات سامنے آنے کا امکان ہے۔