پاکستان اور ایران کا تجارت کا حجم 10 ارب ڈالر تک بڑھانے پر اتفاق

پاکستان اور ایران نے دوطرفہ اقتصادی تعاون اور سرحدی تجارت کے فروغ کے عزم کا اعادہ کرتے ہوئے تجارت کا حجم 10 ارب ڈالر تک بڑھانے پر اتفاق کیا ہے۔

بورڈ آف انویسٹمنٹ کے اعلامیے کے مطابق ایران کے سفیر رضا امیری مقدم نے وفاقی وزیر برائے سرمایہ کاری بورڈ قیصر احمد شیخ سے ملاقات کی، جس میں دوطرفہ اقتصادی تعلقات، سرمایہ کاری اور سرحدی تجارت کے مختلف پہلوؤں پر تبادلہ خیال کیا گیا۔

ملاقات کے دوران وفاقی وزیر قیصر احمد شیخ نے ایرانی سفیر کو یقین دہانی کروائی کہ باہمی اقتصادی تعاون کی راہ میں حائل رکاوٹوں کے حل کے لیے متعلقہ وزارتوں اور اداروں کے ساتھ مکمل تعاون کیا جائے گا۔

اعلامیے کے مطابق ایران نے پاکستان کو وسطی ایشیائی ریاستوں تک رسائی فراہم کرنے کی پیشکش کی، جبکہ دونوں ممالک نے مشترکہ اقتصادی منصوبوں کو آگے بڑھانے پر بھی اتفاق کیا۔

فریقین نے پاکستان اور ایران کے درمیان سرحدی تجارت میں اضافے کے لیے مشترکہ اقدامات پر زور دیا اور روزانہ سرحد پار کرنے والے تجارتی ٹرکوں کی تعداد 2000 تک بڑھانے کی تجویز پر بھی غور کیا گیا۔

ملاقات میں رمدان-گبد اسپیشل اکنامک زون کو جلد فعال بنانے کے فیصلے کا اعادہ کیا گیا، جسے دونوں ممالک کے درمیان اقتصادی روابط کے فروغ میں اہم پیش رفت قرار دیا گیا۔

اعلامیے میں کہا گیا کہ ملاقات کے دوران وزیراعظم شہباز شریف اور آرمی چیف جنرل عاصم منیر کی قیادت کو بھی سراہا گیا۔

دونوں ممالک نے اس عزم کا اظہار کیا کہ باہمی تجارت، سرمایہ کاری اور علاقائی روابط کو مزید وسعت دے کر اقتصادی تعاون کو نئی بلندیوں تک پہنچایا جائے گا۔