گلگت بلتستان کے وزیراعلیٰ امجد حسین کی 12 رکنی کابینہ تشکیل، وزرا کے نام جاری
گلگت بلتستان کے نومنتخب وزیراعلیٰ امجد حسین نے اپنی 12 رکنی کابینہ تشکیل دے دی ہے، جس کا باضابطہ نوٹیفکیشن بھی جاری کر دیا گیا ہے۔
نوٹیفکیشن کے مطابق کابینہ میں پاکستان پیپلز پارٹی (پی پی پی) اور استحکام پاکستان پارٹی (آئی پی پی) کے ارکان کو شامل کیا گیا ہے۔
سروسز اینڈ جنرل ایڈمنسٹریشن ڈیپارٹمنٹ اور کابینہ ڈیپارٹمنٹ کی جانب سے جاری اعلامیے کے مطابق، وزیراعلیٰ امجد حسین کی سفارش پر گلگت بلتستان کے گورنر نے اسمبلی کے 12 ارکان کو صوبائی وزیر مقرر کرنے کی منظوری دی۔
کابینہ میں پاکستان پیپلز پارٹی کے 8 اور استحکام پاکستان پارٹی کے 4 ارکان شامل ہیں۔
پیپلز پارٹی کی جانب سے ذوالفقار علی مراد، سید جلال شاہ، محمد علی اختر، نیک نام کریم، اقبال حسن، راجا ناصر خان، محمد نسیم اور سید توقیر مہدی کو وزیر مقرر کیا گیا ہے۔
استحکام پاکستان پارٹی کی جانب سے امان علی، اسد شفیق، انور علی اور محمد دلپذیر کو کابینہ میں شامل کیا گیا ہے۔
نوٹیفکیشن میں کسی بھی وزیر کے قلمدان (وزارت) کا اعلان نہیں کیا گیا، جس سے ظاہر ہوتا ہے کہ مختلف محکموں کی تقسیم بعد میں کی جائے گی۔
قابلِ ذکر بات یہ ہے کہ استحکام پاکستان پارٹی کے یہ چاروں ارکان 7 جون کو ہونے والے گلگت بلتستان اسمبلی کے انتخابات میں آزاد امیدواروں کے طور پر کامیاب ہوئے تھے، تاہم بعد میں انہوں نے استحکام پاکستان پارٹی میں شمولیت اختیار کر لی تھی۔
اس وقت گلگت بلتستان اسمبلی میں پاکستان پیپلز پارٹی کے 14، پاکستان مسلم لیگ (ن) کے 9، استحکام پاکستان پارٹی کے 7، مجلس وحدت المسلمین کا ایک اور پاکستان تحریک انصاف کی حمایت یافتہ ایک آزاد رکن موجود ہے۔
دوسری جانب جی بی اے-9 اسکردو-III کی نشست پر ضمنی انتخاب بھی متوقع ہے۔ گلگت بلتستان سپریم اپیلیٹ کورٹ کی جانب سے پیپلز پارٹی کے امیدوار فدا محمد نشاد کو کاغذاتِ نامزدگی میں اثاثے چھپانے پر نااہل قرار دینے کے بعد الیکشن کمیشن نے اس نشست پر ضمنی انتخاب کا اعلان کیا تھا، تاہم ابھی تک پولنگ کی تاریخ جاری نہیں کی گئی۔
واضح رہے کہ حالیہ انتخابات کے بعد پاکستان مسلم لیگ (ن) اور استحکام پاکستان پارٹی نے وزیراعلیٰ، اسپیکر اور ڈپٹی اسپیکر کے انتخابات میں پاکستان پیپلز پارٹی کی حمایت کی تھی، تاہم باہمی اتفاق کے تحت مسلم لیگ (ن) نے اسمبلی میں اپوزیشن بینچوں پر بیٹھنے کا فیصلہ کیا تھا۔
