پی ٹی آئی نے پیپلز پارٹی کے امیدواروں کی حمایت کی، خواجہ آصف کا دعویٰ

وزیر دفاع خواجہ آصف نے دعویٰ کیا ہے کہ پاکستان تحریک انصاف (پی ٹی آئی) نے آزاد کشمیر انتخابات میں پاکستان پیپلز پارٹی (پی پی پی) کے امیدواروں کی حمایت کی۔

جیو نیوز سے گفتگو کرتے ہوئے خواجہ آصف نے کہا کہ بعض مقامات پر ایسا محسوس ہوا کہ دونوں جماعتوں کی مشترکہ کوششیں جاری تھیں۔

انہوں نے کہا کہ وہ گزشتہ 55 برس سے کشمیر کے انتخابات دیکھتے آ رہے ہیں اور اس بار شہری علاقوں میں ووٹر ٹرن آؤٹ نمایاں طور پر زیادہ رہا۔

خواجہ آصف کے مطابق شہر میں 45 فیصد سے زائد ٹرن آؤٹ ریکارڈ کیا گیا، جبکہ مسلم لیگ (ن) نے انتخابی مہم میں بھرپور محنت کی۔ 

انہوں نے یہ دعویٰ بھی کیا کہ پیپلز پارٹی نے اس شہر سے آخری انتخاب 1970 میں جیتا تھا اور اب اس کی عوامی مقبولیت ختم ہو چکی ہے۔