ٹرمپ کا نیتن یاہو کو جواب دینے کا اعلان

امریکی صدر ڈونلڈ ٹرمپ نے کہا ہے کہ وہ اسرائیلی وزیراعظم بنیامن نیتن یاہو کی جانب سے امن کونسل کے 15 نکاتی منصوبے کو مسترد کیے جانے پر جلد اپنا ردعمل دیں گے۔ وائٹ ہاؤس کے اوول آفس میں صحافیوں سے گفتگو کرتے ہوئے ٹرمپ نے کہا کہ وہ اپنا جواب سوشل میڈیا پلیٹ فارم ’ٹروتھ سوشل‘ پر جاری کریں گے۔ نیتن یاہو نے امریکی حمایت یافتہ 15 نکاتی غزہ منصوبے کو مسترد کرتے ہوئے کہا ہے کہ حماس کے مکمل غیر مسلح ہونے تک اسرائیلی فوج غزہ سے دستبردار نہیں ہوگی۔

ٹرمپ نے کہا کہ ان کے پاس نیتن یاہو کے موقف کے حوالے سے ایک اچھا جواب موجود ہے اور وہ اسے ٹروتھ سوشل پر شائع کریں گے۔ تاہم امریکی صدر نے ساتھ ہی واضح کیا کہ ان کے اور اسرائیلی وزیراعظم کے درمیان تعلقات اب بھی بہت اچھے ہیں۔

دوسری جانب ٹرمپ نے آبنائے ہرمز کے حوالے سے دعویٰ کیا ہے کہ آبنائے سے تمام بارودی سرنگیں ہٹا دی گئی ہیں اور یہ مکمل طور پر کھلی ہے۔ انہوں نے کہا کہ متعدد بحری جہاز آبنائے ہرمز سے گزر رہے ہیں جبکہ امریکی بحریہ آبنائے پر مکمل کنٹرول رکھتی ہے۔ تاہم تازہ بین الاقوامی رپورٹس میں آبنائے کی مکمل بحالی کے حوالے سے صورتحال متنازع اور مذاکرات جاری ہونے کا ذکر کیا گیا ہے۔

ٹرمپ نے ایران سے معاوضے کا مطالبہ بھی کیا ہے۔ ان کا کہنا ہے کہ ایران کو ان افراد کے خاندانوں کو مالی معاوضہ دینا چاہیے جو ایرانی اقدامات کے نتیجے میں ہلاک یا شدید زخمی ہوئے۔ رپورٹس کے مطابق ٹرمپ نے گزشتہ پانچ ماہ کے دوران ہلاک ہونے والے تقریباً 52 ہزار مظاہرین کا بھی حوالہ دیا اور ایران سے ماضی کے مختلف تنازعات میں ہونے والی ہلاکتوں اور نقصانات کی ذمہ داری قبول کرنے کا مطالبہ کیا ہے۔

یہ بیانات ایسے وقت میں سامنے آئے ہیں جب امریکا اور ایران کے درمیان مذاکرات آبنائے ہرمز کی دوبارہ مکمل بحالی اور جنگ کے خاتمے کے معاملے پر تعطل کا شکار ہیں، جبکہ ایران نے بھی آبنائے کھولنے کے لیے اپنی شرائط اور جنگی نقصانات کے معاوضے کا مطالبہ پیش کیا ہے۔