ٹرمپ نے کیٹی زکریا کووائٹ ہاؤس کی نئی ترجمان مقرر کردیا

امریکی صدر ڈونلڈ ٹرمپ نے قدامت پسند سیاسی مبصر اور اپنی میڈیا کمپنی کی کمیونیکیشنز مشیر کیٹی زکریا کو وائٹ ہاؤس کی نئی ترجمان مقرر کردیا ہے۔

کیٹی زکریا سابق ترجمان کیرولین لیوٹ کی جگہ ذمہ داریاں سنبھالیں گی، جو اگست میں اس عہدے سے الگ ہوگئی تھیں۔ صدر ٹرمپ نے کیٹی زکریا کی تقرری کا اعلان اپنے سوشل میڈیا پلیٹ فارم ٹروتھ سوشل پر کیا۔ ایسوسی ایٹڈ پریس نے بھی تصدیق کی ہے کہ زکریا وائٹ ہاؤس کی چیف ترجمان کی ذمہ داریاں سنبھالیں گی۔

کیٹی زکریا اس وقت ٹرمپ میڈیا اینڈ ٹیکنالوجی گروپ سے وابستہ ہیں، جو ٹرمپ کے سوشل میڈیا پلیٹ فارم ٹروتھ سوشل کا مالک ہے۔ اس سے قبل وہ مختصر عرصے کے لیے امریکی محکمہ داخلی سلامتی کی ترجمان کے طور پر بھی خدمات انجام دے چکی ہیں۔ وہ فاکس نیوز اور نیوز میکس سے بھی بطور سیاسی مبصر وابستہ رہی ہیں۔

کیٹی زکریا ٹرمپ کی صدارتی انتخابی مہمات میں بھی کردار ادا کرچکی ہیں، خصوصاً اہم سوئنگ ریاستوں میں۔ صدر ٹرمپ نے انہیں وفادار اور باصلاحیت حامی قرار دیا۔

تقرری کے بعد کیٹی زکریا نے صدر ٹرمپ کا شکریہ ادا کرتے ہوئے اسے اپنے لیے بڑا اعزاز قرار دیا۔ انہوں نے کہا کہ ان کی توجہ امریکی عوام تک انتظامیہ کی پالیسیوں اور کامیابیوں کو پہنچانے پر ہوگی۔

کیٹی زکریا کی تقرری ایسے وقت میں ہوئی ہے جب امریکا میں 3 نومبر کو وسط مدتی کانگریسی انتخابات ہونے والے ہیں۔ اس دوران وائٹ ہاؤس کی ترجمان کی ذمہ داری انتظامیہ کے سیاسی اور حکومتی مؤقف کو عوام تک پہنچانے کے حوالے سے اہم ہوگی۔

سابق ترجمان کیرولین لیوٹ نے اگست میں عہدے سے الگ ہونے کا اعلان کیا تھا اور کہا تھا کہ وہ اپنے بچوں کے ساتھ زیادہ وقت گزارنا چاہتی ہیں۔ وہ یکم نومبر سے فاکس نیوز کے لیے آن ایئر کنٹریبیوٹر کے طور پر کام شروع کریں گی۔