بیڈروم میں اَن دیکھی چیز تھی، الماریاں خود کھل جاتیں، میوزک سسٹم بھی خود چل پڑتا، سلمان خان
بالی ووڈ کے معروف اداکار سلمان خان نے اپنی جوانی کے ایک غیر معمولی تجربے کا ذکر کرتے ہوئے بتایا ہے کہ ممبئی میں واقع گلیکسی اپارٹمنٹس کے بیڈروم میں انہیں اکثر کسی ان دیکھے وجود کی موجودگی محسوس ہوتی تھی۔
سلمان خان نے یہ واقعہ فلم ساز کرن جوہر کے پروگرام کافی ود کرن کے نویں سیزن میں بطور مہمان شرکت کے دوران بیان کیا۔
اداکار کے مطابق وہ اپنے بیڈروم میں کبھی اکیلے نہیں سوتے تھے کیونکہ انہیں کمرے میں کسی کی آہٹ محسوس ہوتی تھی، تاہم انہوں نے اس نامعلوم وجود کو کبھی اپنی آنکھوں سے نہیں دیکھا۔
سلمان خان نے بتایا کہ ان کے کمرے میں کئی ایسے واقعات پیش آتے تھے جن کی کوئی واضح وجہ ان کی سمجھ میں نہیں آتی تھی۔
ان کے مطابق جب بھی وہ بیڈروم سے باہر نکلتے تو بعض اوقات روشنیاں جھلملا اٹھتیں، الماریاں خودبخود کھل جاتیں اور میوزک سسٹم بھی کسی کے چلائے بغیر کام کرنا شروع کر دیتا تھا۔
اداکار نے مزید بتایا کہ غسل خانے میں موجود ہونے کے دوران بھی انہیں کمرے کے اندر کسی کی موجودگی کا احساس ہوتا تھا۔
سلمان خان کے بقول ایسا لگتا تھا جیسے غسل خانے کے باہر کوئی شخص الماریوں کو کھول رہا ہو یا ان میں رکھی چیزوں کے ساتھ چھیڑ چھاڑ کر رہا ہو۔
انہوں نے کہا کہ ان واقعات کی وجہ سے انہیں محسوس ہوتا تھا کہ کمرے میں کوئی نہ کوئی موجود ہے، چاہے وہ کوئی انسان ہو یا کوئی ایسا وجود جسے وہ دیکھ نہیں سکتے تھے۔
گفتگو کے دوران کرن جوہر نے سلمان خان سے سوال کیا کہ کیا وہ اپنے بیڈروم کو آسیب زدہ سمجھتے تھے؟
اس پر سلمان خان نے وضاحت کی کہ وہ اس تجربے کو لازمی طور پر بھوت پریت یا آسیب سے منسوب نہیں کرتے، البتہ انہیں کسی غیر مرئی موجودگی کا احساس ضرور ہوتا تھا۔
ان پراسرار واقعات کے باوجود سلمان خان نے بتایا کہ وہ کبھی خوف زدہ نہیں ہوئے۔
اداکار کے مطابق انہیں اس لیے ڈر محسوس نہیں ہوا کیونکہ جس نامعلوم موجودگی کا انہیں احساس ہوتا تھا، اس نے کبھی انہیں کوئی نقصان نہیں پہنچایا۔
