مکہ دفاعی معاہدہ جنگ نہیں، علاقائی امن اور دفاع کے لیے ہے، محسن نقوی

وفاقی وزیر داخلہ محسن نقوی نے کہا ہے کہ مکہ دفاعی معاہدے کا مقصد جنگ نہیں بلکہ دفاع ہے اور پاکستان اس معاہدے کے ذریعے خطے میں امن و سلامتی کا خواہاں ہے۔

 انہوں نے اس معاہدے کو علاقائی سلامتی کے لیے پاکستان کے عزم کی مثال قرار دیتے ہوئے کہا کہ پاکستان ایران اور امریکا کے درمیان امن کے قیام کے لیے اپنی کوششیں جاری رکھے گا۔ 

قطر سکیورٹی فورم سے خطاب کرتے ہوئے وفاقی وزیر داخلہ نے کہا کہ پاکستان نے دہشتگردی کے خلاف جنگ میں ہزاروں قربانیاں دی ہیں اور کئی برسوں تک دہشتگرد عناصر کے خلاف کارروائیاں کی ہیں۔ 

محسن نقوی نے کہا کہ پاکستان خود دہشتگردی سے متاثر ہونے والا ملک ہے اور اس خطرے کے خاتمے کے لیے طویل عرصے سے اقدامات کرتا آ رہا ہے۔ 

انہوں نے کہا کہ پاکستان نے ہمیشہ خطے میں امن کے قیام کی کوشش کی ہے اور علاقائی امن مذاکرات میں بھی اہم کردار ادا کیا ہے۔ 

وفاقی وزیر داخلہ کے مطابق مذاکرات کی کامیابی کے لیے فریقین کے درمیان باہمی اعتماد اور بھروسہ نہایت ضروری ہے، کیونکہ اعتماد کے بغیر مذاکرات کو کامیاب بنانا ممکن نہیں۔ 

محسن نقوی نے واضح کیا کہ پاکستان ایران اور امریکا کے درمیان امن قائم کرنے کے لیے اپنی سفارتی کوششیں جاری رکھے گا۔ 

مکہ دفاعی معاہدے سے متعلق گفتگو کرتے ہوئے انہوں نے کہا کہ اس کا مقصد کسی جنگ میں شامل ہونا نہیں بلکہ دفاع کو یقینی بنانا اور خطے میں امن و استحکام کو فروغ دینا ہے۔ 

وزیر داخلہ نے کہا کہ یہ معاہدہ علاقائی سلامتی کے حوالے سے پاکستان کے عزم کی عکاسی کرتا ہے اور پاکستان ہمیشہ امن کی بات کرتا رہا ہے۔ 

انہوں نے عالمی امن کے لیے قطر کی ثالثی کی کوششوں کو سراہتے ہوئے کہا کہ قطر بین الاقوامی سطح پر بطور ثالث اہم کردار ادا کر رہا ہے۔ 

محسن نقوی نے فیلڈ مارشل عاصم منیر کے کردار کی بھی تعریف کرتے ہوئے کہا کہ انہوں نے عالمی امن کے لیے انتہائی اہم کردار ادا کیا ہے۔