اے آئی کا بڑھتا استعمال، بارکلیز بینک کا 5 ہزار ملازمین فارغ کرنے کا اعلان

مصنوعی ذہانت کے بڑھتے استعمال کے باعث بینکاری کے شعبے میں ملازمتوں پر اثرات نمایاں ہونے لگے ہیں۔ برطانیہ کے معروف بینک بارکلیز نے 2026 کے اختتام تک دنیا بھر میں اپنے 5 ہزار ملازمین کو فارغ کرنے کا اعلان کردیا ہے۔ یہ فیصلہ ایسے وقت میں سامنے آیا ہے جب بینک کے تیسری سہ ماہی کے منافع میں 13 فیصد اضافہ ریکارڈ کیا گیا ہے۔ 

رپورٹ کے مطابق بارکلیز بینک اپنے انتظامی اور روزمرہ دفتری امور میں مصنوعی ذہانت اور خودکار نظاموں کے استعمال کو تیزی سے بڑھا رہا ہے، جس کے نتیجے میں بعض شعبوں میں انسانی عملے کی ضرورت کم ہورہی ہے۔ 

بینک کی جانب سے روایتی دفتری کاموں کو جدید ڈیجیٹل ٹیکنالوجی کے ذریعے انجام دینے پر زیادہ توجہ دی جارہی ہے تاکہ کام کی رفتار اور ادارے کی مجموعی کارکردگی بہتر بنائی جاسکے۔ 

ملازمین کی تعداد کم کرنے کی ایک بڑی وجہ آپریٹنگ اخراجات میں کمی لانا بھی ہے۔ بینک انتظامیہ کا مقصد کاروباری نظام کو زیادہ مؤثر، تیز رفتار اور منافع بخش بنانا ہے۔ 

تاہم اس فیصلے کا اہم پہلو یہ ہے کہ بینک ملازمین کو ایسے وقت میں فارغ کرنے کی منصوبہ بندی کررہا ہے جب اس کی مالی کارکردگی بہتر ہوئی ہے۔ 

رپورٹ کے مطابق مالی سال کی تیسری سہ ماہی میں بارکلیز بینک کے منافع میں 13 فیصد اضافہ ہوا، لیکن اس کے باوجود انتظامیہ نے مصنوعی ذہانت اور ڈیجیٹل ٹیکنالوجی پر مبنی کاروباری نظام کی جانب منتقلی کے تحت ملازمین کی تعداد کم کرنے کا فیصلہ کیا ہے۔ 

بارکلیز کا یہ اقدام عالمی بینکاری شعبے میں ہونے والی تبدیلیوں کی بھی نشاندہی کرتا ہے، جہاں بڑے مالیاتی ادارے روایتی افرادی قوت پر انحصار کم کرکے مصنوعی ذہانت اور مشین لرننگ کے استعمال کو فروغ دے رہے ہیں۔ 

اقتصادی اور لیبر مارکیٹ کے ماہرین نے خدشہ ظاہر کیا ہے کہ آنے والے برسوں میں مصنوعی ذہانت کا بڑھتا استعمال بینکاری، کسٹمر سپورٹ اور ڈیٹا پراسیسنگ کے شعبوں میں ملازمتوں کے لیے مشکلات پیدا کرسکتا ہے۔ 

ماہرین کے مطابق معمول کے دفتری امور، صارفین کو خدمات فراہم کرنے اور معلومات کی پراسیسنگ جیسے کام خودکار نظاموں کے ذریعے انجام دیے جانے سے بعض ملازمتوں کی ضرورت کم ہوسکتی ہے۔ 

کم لاگت، تیز رفتاری اور بہتر کارکردگی کی وجہ سے اداروں میں جدید ٹیکنالوجی کو ترجیح دینے کا رجحان بڑھ رہا ہے، جس سے مستقبل میں روزگار کے مواقع اور افرادی قوت کی ضروریات متاثر ہونے کا خدشہ ہے۔ 

بارکلیز بینک کی جانب سے 5 ہزار ملازمین کو فارغ کرنے کے اعلان نے ایک بار پھر یہ سوال سامنے لایا ہے کہ مصنوعی ذہانت سے کمپنیوں کے منافع اور کارکردگی میں بہتری کے ساتھ ملازمین کے روزگار کو کس حد تک تحفظ مل سکے گا۔