اسلام آباد میں بلدیاتی انتخابات کی تیاریاں مکمل، الیکشن کمیشن نے انتظامات کو حتمی شکل دے دی

الیکشن کمیشن آف پاکستان نے وفاقی دارالحکومت اسلام آباد میں بلدیاتی انتخابات کے انعقاد کے لیے انتخابی تیاریاں مکمل ہونے کا اعلان کرتے ہوئے کہا ہے کہ کمیشن پُرامن اور منظم انداز میں انتخابات کرانے کے لیے تیار ہے۔

چیف الیکشن کمشنر سکندر سلطان راجہ کو اسلام آباد میں بلدیاتی انتخابات کے انتظامات، اب تک کیے گئے اقدامات اور آئندہ کی حکمت عملی سے متعلق تفصیلی بریفنگ دی گئی۔

الیکشن کمیشن کے جاری کردہ اعلامیے کے مطابق سیکریٹری الیکشن کمیشن اور دیگر سینئر افسران نے چیف الیکشن کمشنر کو اسلام آباد کے بلدیاتی نظام، مختلف نشستوں پر انتخابات کے طریقہ کار اور انتخابی عمل کی تیاریوں سے آگاہ کیا۔

بریفنگ کے دوران بتایا گیا کہ بلدیاتی انتخابات کے لیے درکار تمام انتخابی مٹیریل کی خریداری مکمل کرلی گئی ہے، جبکہ بیلٹ پیپرز کی چھپائی کے انتظامات بھی حتمی شکل اختیار کرچکے ہیں۔

الیکشن کمیشن حکام کے مطابق سیکریٹری وزارت داخلہ، انسپکٹر جنرل پولیس اسلام آباد اور ڈپٹی کمشنر اسلام آباد کو ضروری انتخابی اور انتظامی اقدامات کے حوالے سے خطوط بھی ارسال کیے جاچکے ہیں۔

حکام نے بریفنگ میں بتایا کہ الیکشن کمیشن وفاقی دارالحکومت میں بلدیاتی انتخابات کے پُرامن انعقاد کے لیے مکمل طور پر تیار ہے۔

چیف الیکشن کمشنر سکندر سلطان راجہ نے اب تک کیے گئے انتخابی انتظامات پر اطمینان کا اظہار کرتے ہوئے 10 نومبر 2026 بروز منگل الیکشن کمیشن سیکرٹریٹ میں اہم اجلاس طلب کرنے کی ہدایت کی۔

اعلامیے کے مطابق اجلاس میں سیکریٹری وزارت داخلہ، چیف کمشنر اسلام آباد اور آئی جی اسلام آباد کو شرکت کی دعوت دی جائے گی۔

اجلاس کے دوران متعلقہ حکام الیکشن کمیشن کو بلدیاتی انتخابات کے لیے تیار کیے گئے سیکیورٹی پلان اور دیگر انتظامی امور پر تفصیلی بریفنگ دیں گے۔

الیکشن کمیشن کا کہنا ہے کہ اس اجلاس کا بنیادی مقصد اسلام آباد میں بلدیاتی انتخابات کے پُرامن، شفاف اور منظم انعقاد کے لیے کیے گئے انتظامات کا جائزہ لینا ہے۔