سپین کے فٹبالر جیسس ڈی میگوئل میچ کے دوران شدید زخمی ہونے کے بعد انتقال کر گئے

سپین کے فٹبالر جیسس ڈی میگوئل میچ کے دوران حریف ٹیم کے گول کیپر سے زور دار ٹکر کے نتیجے میں شدید زخمی ہونے کے بعد انتقال کر گئے۔ 

برطانوی میڈیا رپورٹس کے مطابق افسوس ناک واقعہ سپین کے سیکنڈ ڈویژن فٹبال میچ کے دوران پیش آیا، جہاں جیسس ڈی میگوئل کی مخالف ٹیم کے گول کیپر سے شدید ٹکر ہوگئی۔ 

رپورٹس کے مطابق ٹکر اس قدر شدید تھی کہ فٹبالر کے سر اور سینے پر سنگین چوٹیں آئیں، جس کے بعد ان کی حالت تشویش ناک ہوگئی۔ 

طبی حکام کی جانب سے پیر کے روز جیسس ڈی میگوئل کی حالت انتہائی تشویش ناک قرار دی گئی تھی۔ 

تاہم منگل کی صبح ان کی طبیعت مزید بگڑ گئی اور وہ زخموں کی تاب نہ لاتے ہوئے انتقال کر گئے۔ 

میڈیا رپورٹس کے مطابق میچ کے دوران مخالف کھلاڑی سے ٹکرانے پر حریف ٹیم کے گول کیپر کو ریڈ کارڈ دکھایا گیا تھا۔ 

جیسس ڈی میگوئل کی موت میچ کے دوران لگنے والی شدید چوٹوں کے بعد ہوئی، جبکہ ابتدائی رپورٹس میں ان کے علاج اور حادثے کے مزید حالات سے متعلق تفصیلات فراہم نہیں کی گئیں۔