سکاٹ کولم 140 سال بعد امریکی ریاست مسیسیپی سےجیتنے والے پہلے سیاہ فام سینیٹر بن گئے

مسیسیپی: امریکی ریاست مسیسیپی میں ڈیموکریٹ امیدوار سکاٹ کولم نے سینیٹ کی نشست پر غیر متوقع کامیابی حاصل کرتے ہوئے موجودہ رپبلکن سینیٹر سنڈی ہائیڈ اسمتھ کو شکست دے دی۔

اس کامیابی کے ساتھ سکاٹ کولم گزشتہ 140 سال سے زائد عرصے میں مسیسیپی سے امریکی سینیٹ کے لیے منتخب ہونے والے پہلے سیاہ فام شخص بن گئے ہیں۔

مسیسیپی کئی دہائیوں سے رپبلکن امیدواروں کی مضبوط انتخابی حمایت کے لیے مشہور رہی ہے، تاہم اس مرتبہ انتہائی سخت مقابلے کے بعد ڈیموکریٹ امیدوار نے کامیابی حاصل کی۔

تقریباً 10 لاکھ ووٹوں کی گنتی کے بعد سکاٹ کولم اور ان کی رپبلکن حریف سنڈی ہائیڈ اسمتھ کے درمیان ووٹوں کا فرق 5 ہزار سے بھی کم رہا۔

امریکی نشریاتی ادارے سی بی ایس کے اعداد و شمار کے مطابق 43 سالہ سکاٹ کولم نے 49.2 فیصد ووٹ حاصل کیے، جبکہ سنڈی ہائیڈ اسمتھ کو 48.7 فیصد ووٹ ملے۔

انتخابات میں حصہ لینے والے ایک آزاد امیدوار نے 2.1 فیصد ووٹ حاصل کیے۔اس نتیجے کے بعد 100 رکنی امریکی سینیٹ میں ڈیموکریٹک پارٹی کی نشستوں کی تعداد 55 ہوگئی ہے، جبکہ الاسکا میں ایک انتہائی سخت مقابلے والی نشست کا نتیجہ ابھی آنا باقی ہے۔

موجودہ رپبلکن سینیٹر سنڈی ہائیڈ اسمتھ نے بدھ کی شام سوشل میڈیا پلیٹ فارم ایکس پر جاری ویڈیو پیغام میں اپنی شکست تسلیم کرتے ہوئے سکاٹ کولم کو کامیابی پر مبارک باد دی۔

انہوں نے نومنتخب سینیٹر کے لیے نیک خواہشات کا اظہار کرتے ہوئے کہا کہ اگرچہ یہ وہ نتیجہ نہیں تھا جس کی ان کی جماعت اور انتخابی مہم کو امید تھی، تاہم وہ مسیسیپی کے ووٹروں کے فیصلے کا احترام کرتی ہیں۔

دوسری جانب سکاٹ کولم نے اپنی کامیابی کے بعد ٹوگالو کالج کے کیمپس میں حامیوں سے خطاب کیا، جہاں رات کے وقت سینکڑوں افراد ان کے استقبال اور جشن منانے کے لیے جمع ہوئے تھے۔

4 نومبر کو ہونے والے انتخابات کے بعد کئی روز تک نتائج کا انتظار کیا جاتا رہا، تاہم کامیابی کی تصدیق ہوتے ہی ڈیموکریٹ امیدوار کے حامیوں میں خوشی کی لہر دوڑ گئی۔

اپنی فتح کی تقریر میں سکاٹ کولم نے انتخابی مہم کے دوران حمایت کرنے والے تمام افراد کا شکریہ ادا کیا۔انہوں نے کہا کہ بہت سے لوگوں کو یقین نہیں تھا کہ ایسا تاریخی لمحہ بھی آسکتا ہے، لیکن انہوں نے اپنا یقین برقرار رکھا اور کامیابی کی امید نہیں چھوڑی۔

سکاٹ کولم نے کہا کہ یہ کامیابی صرف ان کا ذاتی کارنامہ نہیں بلکہ تمام حامیوں اور کارکنوں کی مشترکہ کامیابی ہے۔انہوں نے مسیسیپی کے مقامی لوگوں اور انتخابی کارکنوں کو خراج تحسین پیش کرتے ہوئے کہا کہ اصل تبدیلی اور فیصلہ کن فرق مقامی لوگ ہی پیدا کرتے ہیں۔

اس نتیجے کے ساتھ مسیسیپی میں رپبلکن پارٹی کی وہ مسلسل انتخابی برتری ختم ہوگئی ہے جو 1982 سے قائم تھی۔

انتخابات سے قبل اس نشست پر اتنے سخت مقابلے کی توقع نہیں کی جارہی تھی، کیونکہ سنڈی ہائیڈ اسمتھ ایک ایسی ریاست میں دوبارہ انتخاب لڑ رہی تھیں جہاں صدر ڈونلڈ ٹرمپ نے 2024 کے صدارتی انتخابات میں 22 فیصد سے زائد ووٹوں کے فرق سے کامیابی حاصل کی تھی۔

تاہم ان وسط مدتی انتخابات میں ڈیموکریٹک پارٹی نے کئی اہم انتخابی کامیابیاں حاصل کی ہیں اور امریکی ایوان نمائندگان کے ساتھ سینیٹ کا کنٹرول بھی حاصل کرلیا ہے۔