چاغی میں تانبے اور سونے کی نئی دریافت، ماری انرجیز نے ریکوڈک کے قریب معدنیات کی تصدیق کردی

کوئٹہ: بلوچستان کے ضلع چاغی میں تانبے اور سونے کی نئی معدنیاتی دریافت سامنے آئی ہے، جہاں ماری انرجیز لمیٹڈ نے ریکوڈک منصوبے سے تقریباً 50 کلومیٹر مشرق میں تانبے اور سونے کی موجودگی کی تصدیق کردی ہے۔

کمپنی کے مطابق ابتدائی تحقیقی ڈرلنگ اور حاصل کردہ نمونوں کے لیبارٹری تجزیوں سے علاقے میں تانبے کے ایک نئے پورفیری معدنی نظام کی نشاندہی ہوئی ہے۔

ماری انرجیز لمیٹڈ نے جمعے کو پاکستان سٹاک ایکسچینج میں جمع کرائے گئے اعلامیے میں بتایا کہ اس کی مکمل ملکیتی ذیلی کمپنی نے بلوچستان کے علاقے کوہ سلطان میں ایسٹ سیاہ ڈق کے مقام پر تانبے اور سونے کی معدنیات دریافت کی ہیں۔

یہ مقام ضلع چاغی میں نوکنڈی سے تقریباً 25 کلومیٹر شمال مغرب میں واقع ہے۔

کمپنی کے مطابق ایسٹ سیاہ ڈق کے ای ایس ڈی ون ہدف پر اب تک دو مراحل، فیز ون اے اور فیز ون بی کے دوران تقریباً 25 ہزار میٹر طویل تحقیقی ڈرلنگ مکمل کی جاچکی ہے۔

ڈرلنگ کے تمام سوراخوں کی گہرائی 500 میٹر رکھی گئی، جن کے نتائج سے تقریباً 100 میٹر موٹی ریتلی تہہ کے نیچے تانبے کی معدنیات کی موجودگی سامنے آئی۔

اعلامیے کے مطابق دریافت شدہ معدنیات کا پھیلاؤ تقریباً 1.4 مربع کلومیٹر رقبے پر مشتمل ہے۔

ماری انرجیز کا کہنا ہے کہ اب تک مکمل ہونے والی ڈرلنگ کے نتائج کی بنیاد پر ایسٹ سیاہ ڈق کو تانبے کے ایک نئے پورفیری ذخیرے کی ابتدائی دریافت قرار دیا جاسکتا ہے۔

کمپنی کے مطابق دریافت ہونے والی معدنیات میں بنیادی طور پر چالکوپائرائٹ شامل ہے، جو تانبے پر مشتمل ایک اہم معدنی جزو ہے۔

اس کے علاوہ پائرائٹ اور بورنائٹ کی موجودگی بھی ریکارڈ کی گئی ہے، جبکہ بعض ڈرلنگ سوراخوں میں مولیبڈینم کی معدنیات بھی سامنے آئی ہیں۔

اعلامیے میں بتایا گیا ہے کہ علاقے کے بعض حصوں میں تانبے کے سبز اور نیلے رنگ کے آکسائیڈ معدنی اجزا بھی پائے گئے ہیں، جو مزید معدنیاتی سرگرمی کی نشاندہی کرتے ہیں۔

ماری انرجیز کے مطابق پہلے مرحلے یعنی فیز ون اے کے دوران حاصل کیے گئے نمونوں کی لیبارٹری جانچ مکمل کرلی گئی ہے، جبکہ فیز ون بی کے نمونوں کے تجزیے کا عمل جاری ہے۔

کمپنی نے توقع ظاہر کی ہے کہ دوسرے مرحلے کے نمونوں کے لیبارٹری نتائج 2027 کی پہلی سہ ماہی میں مکمل ہوجائیں گے۔

اعلامیے کے مطابق نمونوں کی تیاری اور جانچ کا کام ایس جی ایس پاکستان نے انجام دیا۔

تجزیاتی نتائج کے معیار اور درستی کی تصدیق کے لیے آسٹریلیا کے ادارے اوریاز کے تصدیق شدہ معیاری نمونے بھی استعمال کیے گئے۔

کمپنی کے مطابق یہ طریقہ کار معدنیاتی تجزیوں کے معیار اور نتائج کے قابل اعتماد ہونے کو یقینی بنانے کے لیے اختیار کیا گیا۔

ماری انرجیز نے بتایا کہ دریافت کی وسعت اور گہرائی کا تعین کرنے کے لیے مزید تحقیقی ڈرلنگ کی جائے گی۔

آئندہ ڈرلنگ کے دوران بعض مقامات پر ایک ہزار میٹر تک گہرائی میں کھدائی کی جاسکتی ہے۔

اس کے ساتھ دونوں مراحل میں حاصل ہونے والے نتائج کی بنیاد پر ابتدائی ارضیاتی ماڈل اور معدنی وسائل کا تخمینہ بھی تیار کیا جائے گا۔

ان مطالعات کے ذریعے زیر زمین معدنیات کی ساخت، پھیلاؤ، گہرائی اور ممکنہ مقدار کا زیادہ واضح اندازہ لگانے میں مدد ملے گی۔

تاہم ماری انرجیز نے واضح کیا ہے کہ ابتدائی دریافت کو حتمی معدنی ذخائر یا تجارتی اعتبار سے قابل عمل منصوبہ قرار دینا قبل از وقت ہوگا۔

کمپنی کے مطابق دریافت کی اصل مقدار، معیار، معاشی اہمیت اور مستقبل میں اس کی ترقی کے امکانات کا تعین کرنے کے لیے مزید ڈرلنگ، ارضیاتی مطالعات، دھاتوں کی پراسیسنگ سے متعلق تجربات اور معدنی وسائل کے تفصیلی جائزے ضروری ہوں گے۔

اعلامیے میں واضح کیا گیا ہے کہ اب تک سامنے آنے والے تحقیقی نتائج کسی باضابطہ طور پر تسلیم شدہ معدنی وسیلے یا ثابت شدہ معدنی ذخیرے کی حیثیت نہیں رکھتے۔

ماری انرجیز کے مطابق دریافت سے متعلق تکنیکی معلومات کا جائزہ جے ایم جیو سائنس کے ڈاکٹر جان مورٹیمر نے لیا اور ان کی منظوری دی۔

ڈاکٹر جان مورٹیمر کو معدنیات کی تلاش اور ارضیاتی تحقیق کے شعبے میں 40 سال سے زیادہ تجربہ حاصل ہے۔

کمپنی نے کہا ہے کہ منصوبے پر پیش رفت، لیبارٹری تجزیوں کے نتائج اور تکنیکی جائزوں سے متعلق معلومات پاکستان سٹاک ایکسچینج میں آئندہ اعلانات کے ذریعے فراہم کی جاتی رہیں گی۔

بلوچستان کا ضلع چاغی طویل عرصے سے تانبے اور سونے کے وسیع معدنی امکانات کے باعث اہمیت رکھتا ہے۔

اسی علاقے میں واقع ریکوڈک پاکستان کے نمایاں تانبے اور سونے کے معدنی منصوبوں میں شمار ہوتا ہے۔

ریکوڈک منصوبے سے تقریباً 50 کلومیٹر مشرق میں ایسٹ سیاہ ڈق کے مقام پر نئی معدنیاتی دریافت نے چاغی کے اس خطے میں مزید معدنی وسائل کی تلاش کے امکانات کو نمایاں کیا ہے۔

تاہم نئی دریافت کے حجم، معیار اور معاشی افادیت کے بارے میں حتمی نتیجے کے لیے آئندہ ڈرلنگ، لیبارٹری نتائج اور تکنیکی مطالعات بنیادی اہمیت کے حامل ہوں گے۔