روبی انعم کی بشریٰ انصاری پر تنقید: "اب وی لاگنگ چھوڑ کر آرام کرنا چاہیے"

انٹرٹینمنٹ - 18 اگست 2025

معروف کامیڈین اور اداکارہ روبی انعم نے حال ہی میں ایک پوڈکاسٹ میں گفتگو کرتے ہوئے سینئر اداکارہ بشریٰ انصاری پر کڑی تنقید کی۔ ان کا کہنا تھا کہ بشریٰ انصاری اکثر سوشل میڈیا پر وی لاگز بناتی رہتی ہیں، جیسے "اب میں سامان پیک کر رہی ہوں"، لیکن ان کی عمر اب ایسی نہیں کہ وہ یہ سب کرتی رہیں۔ روبی نے سخت لہجے میں کہا: "بس کر دے مائی، اللہ کا خوف کرو۔"

انہوں نے مزید کہا کہ بشریٰ انصاری ہماری ماؤں سے بھی بڑی ہیں اور اب بڑھاپے میں داخل ہو چکی ہیں، لہٰذا اُنہیں آرام کرنا چاہیے۔

گفتگو کے دوران روبی انعم نے اسماء عباس کی تعریف کرتے ہوئے کہا کہ وہ انہیں بے حد عزت اور پروٹوکول دیتی ہیں، تاہم ان پر بھی یہ تبصہ کیا کہ سوشل میڈیا پر "اوور شوٹ" نہ کریں۔ روبی کا کہنا تھا کہ اگر کوئی اداکارہ ڈراموں اور ٹی وی پر پہلے ہی مصروف ہے تو سوشل میڈیا پر اس قدر سرگرم رہنا مناسب نہیں لگتا، الا یہ کہ وہ بہت زیادہ حسین ہوں۔

اپنی ذات کے بارے میں بات کرتے ہوئے روبی انعم نے بتایا کہ انہوں نے کبھی کوئی سرجری نہیں کروائی اور ان کی خوبصورتی قدرتی ہے۔ ان کا کہنا تھا کہ وہ گلاب کے عرق کی بوتل میں آبِ زم زم ڈال کر روزانہ چہرے پر چھڑکتی ہیں، جس سے ان کی جلد تروتازہ رہتی ہے۔

ذاتی زندگی کا ذکر کرتے ہوئے انہوں نے کہا کہ آج ان کے شوہر نے انہیں زندگی کا سب سے قیمتی تحفہ دیا ہے، لیکن ایک وقت ایسا بھی تھا جب ان کے پاس بستر تک موجود نہیں تھا۔ انہوں نے کہا کہ غربت کے دنوں میں بھی انہوں نے اپنے شوہر کے ساتھ وقت گزارا اور ان کی اصل زندگی وہ نہیں ہے جیسا لوگ سمجھتے ہیں۔