راشد منہاس شہید نشانِ حیدر کی 54ویں برسی پر مسلح افواج کا خراج عقیدت

news-banner

پاکستان - 20 اگست 2025

پاکستان کی مسلح افواج نے پائلٹ آفیسر راشد منہاس شہید نشانِ حیدر کی 54 ویں برسی پر انہیں شاندار خراج عقیدت پیش کیا۔

 

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر، چیئرمین جوائنٹ چیفس آف اسٹاف کمیٹی جنرل ساحر شمشاد مرزا، نیول چیف ایڈمرل نوید اشرف اور ایئر چیف مارشل ظہیر احمد بابر سدھو نے قومی ہیرو کو یاد کرتے ہوئے ان کی قربانی کو سلام پیش کیا۔

 

آئی ایس پی آر نے کہا کہ راشد منہاس نے آج ہی کے دن پاکستان کی خودمختاری کے تحفظ کے لیے اپنی جان قربان کی۔ ان کا لازوال جذبہ، حب الوطنی اور وفاداری نہ صرف مسلح افواج بلکہ پوری قوم کے لیے مشعلِ راہ ہے۔

 

ترجمان کے مطابق ان کی بہادری اور قربانی اس بات کی یاد دہانی ہے کہ آزادی کی قیمت ہمیشہ قربانی سے ادا کی جاتی ہے۔ مسلح افواج نے عزم دہرایا کہ راشد منہاس کی قربانی کو ہمیشہ یاد رکھا جائے گا۔

 

آئی ایس پی آر نے مزید کہا کہ راشد منہاس کا نام تاریخ میں بہادری، وفاداری اور قومی فخر کی علامت کے طور پر ہمیشہ زندہ رہے گا۔