بھارت کو امریکی فوجی ٹیکنالوجی دینا خطرناک، پیٹر ناوارو کا انتباہ

news-banner

دنیا - 19 اگست 2025

وائٹ ہاؤس کے تجارتی مشیر پیٹر ناوارو نے خبردار کیا ہے کہ بھارت کو جدید امریکی فوجی ٹیکنالوجی فراہم کرنا خطرناک ثابت ہو سکتا ہے کیونکہ نئی دہلی اپنے تعلقات روس اور چین کے ساتھ مزید مضبوط بنا رہا ہے۔

 

برطانوی جریدے فنانشل ٹائمز میں شائع اپنے مضمون میں ناوارو نے کہا کہ بھارت روسی تیل خرید کر ماسکو کو یوکرین جنگ میں مالی سہارا دے رہا ہے۔ ان کے مطابق اگر بھارت واقعی امریکا کو اپنا تزویراتی شراکت دار سمجھتا ہے تو اسے روسی تیل کی درآمد فوری طور پر روکنا ہوگی۔

 

ناوارو کا کہنا تھا کہ بھارت روسی خام تیل کو عالمی منڈی میں دوبارہ فروخت کر کے ماسکو کو ڈالرز فراہم کر رہا ہے، جو اس بات کی علامت ہے کہ نئی دہلی اپنے مالی مفادات کے تحت چین اور روس کے قریب ہوتا جا رہا ہے۔

 

انہوں نے بھارتی وزیراعظم نریندر مودی اور چینی صدر شی جن پنگ کی متوقع ملاقات کے ساتھ ساتھ چینی وزیر خارجہ کے دورۂ بھارت کو بھی اس تناظر میں اہم قرار دیا۔

 

واضح رہے کہ امریکا پہلے ہی بھارت کو متنبہ کر چکا ہے کہ اگر صدر ٹرمپ اور روسی صدر ولادیمیر پیوٹن کے مذاکرات ناکام ہوئے تو نئی دہلی پر مزید ٹیرف عائد کیے جائیں گے، جبکہ امریکی وفد کا طے شدہ دورۂ بھارت بھی منسوخ کر دیا گیا ہے۔