امریکا نے 6 ہزار غیر ملکی طلبہ کے ویزے منسوخ کر دیے

news-banner

دنیا - 19 اگست 2025

امریکی محکمہ خارجہ نے اعلان کیا ہے کہ 6 ہزار سے زائد غیر ملکی طلبہ کے ویزے منسوخ کر دیے گئے ہیں۔ حکام کے مطابق یہ اقدام امریکی قوانین کی خلاف ورزی، قیام کی مدت ختم ہونے کے باوجود ملک میں موجود رہنے اور بعض سنگین جرائم میں ملوث ہونے پر کیا گیا۔

 

رپورٹ کے مطابق منسوخ شدہ ویزوں میں زیادہ تر طلبہ پر ڈرائیونگ انڈر دی انفلوئنس (DUI)، چوری، تشدد اور بعض پر دہشتگردی کی حمایت جیسے الزامات ہیں۔ تقریباً 4 ہزار ویزے قانون شکنی کی بنیاد پر جبکہ 200 سے 300 ویزے انسدادِ دہشتگردی کے قوانین کے تحت منسوخ کیے گئے۔

 

ٹرمپ انتظامیہ کی سخت امیگریشن پالیسی کے تحت بین الاقوامی طلبہ کے ویزا اسکریننگ کے عمل کو مزید سخت کر دیا گیا ہے۔ اب تمام طلبہ کو اپنے سوشل میڈیا اکاؤنٹس ظاہر کرنے اور ان کی جانچ سے گزرنا لازمی قرار دیا گیا ہے تاکہ امریکی اقدار یا شہریوں کے خلاف کسی بھی قسم کی مخالفت کی نشاندہی ہو سکے۔

 

امریکی وزیرِ خارجہ مارکو روبیو کے مطابق جنوری سے ہزاروں ویزے منسوخ کیے جا چکے ہیں اور مزید اقدامات بھی زیر غور ہیں۔ دوسری جانب ڈیموکریٹس نے اس پالیسی کو انسانی حقوق اور انصاف کے اصولوں کے خلاف قرار دیا ہے۔

 

اعداد و شمار کے مطابق 2023-24 کے تعلیمی سال میں امریکا میں 210 ممالک کے 11 لاکھ سے زیادہ غیر ملکی طلبہ زیر تعلیم تھے۔