9 مئی کیسز کی سماعت ملتوی، 26 نومبر احتجاج کیس میں 4 کارکنان کو سزا

پاکستان - 19 اگست 2025

بانی پی ٹی آئی کی بہن علیمہ خان نے کہا ہے کہ سپریم کورٹ میں 9 مئی کیسز کی سماعت آج نہیں ہو سکی اور اسے کل تک کے لیے ملتوی کر دیا گیا ہے۔ اسلام آباد میں سپریم کورٹ کے باہر میڈیا سے گفتگو کرتے ہوئے ان کا کہنا تھا کہ ہماری خواہش ہے کہ ہائیکورٹ میں بھی ہمارے مقدمات جلد سنے جائیں۔

انہوں نے مزید بتایا کہ بانی پی ٹی آئی نے واضح پیغام دیا ہے کہ حقیقی آزادی تک تحریک جاری رہے گی جبکہ ضمنی انتخابات میں حصہ نہ لینے کا بھی فیصلہ کیا گیا ہے۔

دوسری جانب، انسداد دہشت گردی عدالت راولپنڈی نے 26 نومبر کے احتجاج کیس میں چار ملزمان کو چار، چار ماہ قید کی سزا سنا دی۔ سماعت اے ٹی سی کے جج امجد علی شاہ نے کی، جس میں پراسیکیوٹر ظہیر شاہ اور وکلائے صفائی پیش ہوئے۔

عدالت میں اپنے اقبالی بیانات میں ملزمان نے اعتراف کیا کہ لیڈرشپ کے اکسانے پر وہ پُرتشدد احتجاج میں شریک ہوئے تھے۔ انہوں نے مؤقف اپنایا کہ وہ غریب مزدور ہیں اور عدالت سے سزاؤں میں نرمی کی استدعا کی۔ یہ مقدمہ تھانہ انجرا ضلع اٹک میں جلاؤ گھیراؤ کے الزام میں درج کیا گیا تھا۔