پاکستان کا جنوبی سوڈان کی بگڑتی صورتحال پر سلامتی کونسل میں اظہارِ تشویش

news-banner

دنیا - 20 اگست 2025

اقوام متحدہ میں پاکستان کے مستقل مندوب عاصم افتخار احمد نے جنوبی سوڈان کی خراب ہوتی سیاسی و سلامتی کی صورتحال پر گہری تشویش کا اظہار کیا ہے۔ سلامتی کونسل کے اجلاس سے خطاب کرتے ہوئے انہوں نے کہا کہ 2018ء کا تجدید شدہ امن معاہدہ ہی خطے میں امن کی بنیاد ہے، اور اس کی خلاف ورزی موجودہ بحران کو مزید شدید کر سکتی ہے۔

 

انہوں نے فوری جنگ بندی، معاہدے کی پاسداری اور تمام فریقین کے درمیان مذاکرات کی بحالی پر زور دیا۔ عاصم افتخار کا کہنا تھا کہ جنوبی سوڈان میں سیاسی و سلامتی کے حالات اُس وقت پیچھے کی طرف جا رہے ہیں جب انہیں آگے بڑھنا چاہیے۔

 

پاکستانی مندوب نے تمام سیاسی قیدیوں کی فوری رہائی پر زور دیتے ہوئے کہا کہ اعتماد اور شمولیت ہی پائیدار امن کی ضمانت ہیں۔ انہوں نے کہا کہ 2026 کے آخر میں متوقع انتخابات امن کی امید ہیں لیکن ان کے شفاف اور معتبر انعقاد کے لیے بین الاقوامی تعاون کے ساتھ ساتھ مقامی اعتماد اور جامعیت بھی ضروری ہے۔

 

عاصم افتخار نے انسانی بحران کو ’’سنگین‘‘ قرار دیتے ہوئے کہا کہ مسلح تنازعات، موسمیاتی تبدیلی، ہیضے کی وباء اور ہمسایہ ملک سوڈان کی صورتحال کے اثرات نے لاکھوں افراد کو خطرے میں ڈال دیا ہے۔

 

انہوں نے اقوام متحدہ کے امن مشن (یو این ایم آئی ایس ایس) کو ’’زندگی کی ڈور‘‘ قرار دیتے ہوئے پاکستانی امن فوجیوں کی خدمات کو خراجِ تحسین پیش کیا۔