اے ٹی سی راولپنڈی: عالیہ حمزہ کی عبوری ضمانت خارج، اعظم سواتی اور سلمان اکرم راجا کی ضمانت میں توسیع

news-banner

پاکستان - 19 اگست 2025

راولپنڈی کی انسداد دہشت گردی عدالت نے پاکستان تحریک انصاف (پی ٹی آئی) پنجاب کی چیف آرگنائزر عالیہ حمزہ کی عبوری ضمانت عدم حاضری اور عدم پیروی کی بنیاد پر خارج کر دی۔

 

انسداد دہشت گردی عدالت کے جج امجد علی شاہ نے اکتوبر اور 26 نومبر کے احتجاجی مقدمات کی سماعت کی۔ سماعت کے دوران پراسیکیوٹر سید ظہیر شاہ نے مؤقف اختیار کیا کہ ملزمان دانستہ طور پر تفتیشی عمل پر اثر انداز ہونے کی کوشش کر رہے ہیں۔ ان کے مطابق عالیہ حمزہ کی ضمانت پہلے بھی خارج ہو چکی تھی جس کے بعد انہوں نے دوبارہ ضمانت حاصل کی تھی۔ عدالت نے پراسیکیوٹر کے دلائل سے اتفاق کرتے ہوئے ان کی عبوری ضمانت ختم کر دی۔

 

دوران سماعت، اعظم سواتی کے وکیل نے عدالت کو آگاہ کیا کہ ان کے مؤکل پشاور ہائیکورٹ میں پیش ہیں، لہٰذا حاضری سے استثنیٰ دیا جائے۔ عدالت نے درخواست منظور کرتے ہوئے اعظم سواتی کی عبوری ضمانت میں 27 اگست تک توسیع کر دی۔

 

اسی کیس میں پی ٹی آئی کے سیکرٹری جنرل سلمان اکرم راجا ذاتی حیثیت میں عدالت میں پیش ہوئے، جس پر عدالت نے ان کی عبوری ضمانت میں 3 ستمبر تک توسیع کر دی۔