شاہ رخ خان، جو انڈین پریمیئر لیگ کی ٹیم کولکتہ نائٹ رائیڈرز کے مالک ہیں، دنیا کی مختلف کرکٹ لیگز میں بھی اپنی فرنچائزز رکھتے ہیں۔ وہ ماضی میں پاکستانی کھلاڑیوں کے لیے اپنی پسندیدگی کا اظہار بھی کر چکے ہیں، جس کا ذکر ان کے ایک پرانا بیان سوشل میڈیا پر وائرل ہونے کے باعث پھر سے زیر بحث ہے۔
اب، 2025 کیریبیئن پریمیئر لیگ (سی پی ایل) کے ڈرافٹ میں شاہ رخ خان کی ٹیم ٹرنباگو نائٹ رائیڈرز (ٹی کے آر) نے دو پاکستانی کھلاڑیوں کے ساتھ معاہدہ کیا ہے، جن میں ایک تجربہ کار اسٹار فاسٹ بولر محمد عامر اور دوسرے ابھرتے ہوئے نوجوان عثمان طارق شامل ہیں۔
محمد عامر، جو اس سے قبل چار سیزن سی پی ایل کھیل چکے ہیں، ٹورنامنٹ میں 39 میچز میں 51 وکٹیں حاصل کرچکے ہیں اور اپنی ڈیتھ اوورز کی سوئنگ بولنگ کے لیے مشہور ہیں۔ اُن سے توقع ہے کہ وہ ٹیم کے بولنگ اٹیک کو تقویت دیں گے اور نوجوان کھلاڑیوں کو بھی سیکھنے کا موقع ملے گا۔
دوسری جانب عثمان طارق نے پاکستان سپر لیگ 2025 میں کوئٹہ گلیڈی ایٹرز کی نمائندگی کرتے ہوئے صرف پانچ میچز میں 10 وکٹیں حاصل کر کے سب کی توجہ حاصل کی، اور اسی کارکردگی کی بنیاد پر انہیں بھی سی پی ایل میں موقع دیا گیا ہے۔
یہ پیش رفت کھیل کے میدان میں سرحدوں سے بالاتر تعلقات کی ایک مثبت مثال کے طور پر دیکھی جا رہی ہے۔
دیکھیں
