معروف اداکارہ اور میزبان عفت عمر کا کہنا ہے کہ والدین کو اپنے بچوں سے یہ توقع نہیں رکھنی چاہیے کہ وہ ان کی زندگی کی ذمہ داری اٹھائیں گے۔
ایک حالیہ مارننگ شو میں گفتگو کرتے ہوئے عفت عمر نے والدین کے کردار، ذاتی آزادی اور اپنی بیٹی کی منگنی کے حوالے سے کھل کر اظہارِ خیال کیا۔ انہوں نے انکشاف کیا کہ ان کی بیٹی نے امریکہ میں اپنی پسند سے شریکِ زندگی کا انتخاب کیا، اور انہوں نے ایک ماں کے طور پر اس فیصلے کی مکمل حمایت کی۔
اداکارہ کا کہنا تھا کہ وہ اپنی بیٹی پر کبھی اپنی مرضی مسلط نہیں کرتیں، بلکہ ہمیشہ رہنمائی کو ترجیح دیتی ہیں، نہ کہ کنٹرول کو۔ انہوں نے یہ بھی کہا کہ ان کی بیٹی پر ان کی دیکھ بھال یا خدمت کا کوئی بوجھ نہیں کیونکہ بچوں کی پرورش اس نیت سے کرنا کہ وہ بڑھاپے میں والدین کا سہارا بنیں، ایک غلط سوچ ہے۔
عفت عمر نے کہا کہ والدین کا کردار صرف سہارا دینے والا ہونا چاہیے، واپسی یا بدلے کی توقع رکھنے والا نہیں۔
ان کے اس مؤقف نے سوشل میڈیا پر روایتی خاندانی سوچ پر نئی بحث چھیڑ دی ہے۔ بعض صارفین نے ان کے خیالات کو جدید اور حقیقت پسندانہ قرار دیا، جبکہ کچھ نے خاندانی اور مذہبی روایات کے تناظر میں ان سے اختلاف کیا۔
دیکھیں
