سلمان خان کا انکشاف: 7 برس تک ٹرائی جیمینل نیورالجیا کے اذیت ناک مرض میں مبتلا رہے

ذرائع کے مطابق بالی ووڈ کے سپر اسٹار سلمان خان نے اپنی زندگی کی ایک انتہائی تکلیف دہ حقیقت بیان کرتے ہوئے بتایا ہے کہ وہ ساڑھے سات برس تک ٹرائی جیمینل نیورالجیا (Trigeminal Neuralgia) جیسے خطرناک مرض میں مبتلا رہے، جسے دنیا بھر میں "سوسائیڈل ڈیزیز" بھی کہا جاتا ہے کیونکہ اس کے ناقابلِ برداشت درد کے باعث مریضوں میں خودکشی کی شرح سب سے زیادہ ہے۔

سلمان خان نے ایک شو میں گفتگو کرتے ہوئے بتایا کہ یہ درد ہر چار پانچ منٹ بعد حملہ کرتا تھا، جس کی وجہ سے کھانے پینے جیسی عام سرگرمیاں بھی مشکل ہو جاتی تھیں۔

 انہوں نے کہا کہ ناشتہ کرنے میں ڈیڑھ گھنٹہ لگ جاتا اور دوائیوں کا بھی کوئی اثر نہیں ہوتا تھا۔ 

ابتدائی طور پر ڈاکٹروں کو لگا کہ یہ دانتوں کا مسئلہ ہے، لیکن بعد میں پتہ چلا کہ یہ اعصاب کی بیماری ہے۔ پہلی بار یہ جھٹکا انہیں 2007ء میں فلم پارٹنر کے سیٹ پر محسوس ہوا۔

انہوں نے مزید بتایا کہ خوش قسمتی سے جدید میڈیکل سائنس نے ان کی زندگی آسان بنا دی۔

 انہوں نے گاما نائف سرجری کرائی، جو 7 سے 8 گھنٹے جاری رہی۔ ڈاکٹروں نے کہا تھا کہ درد صرف 20 سے 30 فیصد کم ہوگا، لیکن خوش قسمتی سے یہ مکمل طور پر ختم ہوگیا۔

شو میں شریک عامر خان نے بھی اس بیماری کے ناقابلِ برداشت درد کی شدت کی تصدیق کی۔

 ماہرین کے مطابق ٹرائی جیمینل نیورالجیا چہرے کی ایک انتہائی تکلیف دہ بیماری ہے، جس میں مریض کو بجلی کے جھٹکوں جیسا شدید درد محسوس ہوتا ہے۔