پشاور ہائیکورٹ نے نو منتخب وزیراعلیٰ سے حلف لینے کے لیے گورنر کی دستیابی معلوم کرنے کا حکم دے دیا

پشاور ہائیکورٹ نے نو منتخب وزیراعلیٰ سہیل آفریدی سے حلف لینے کے حوالے سے گورنر خیبرپختونخوا کی دستیابی معلوم کرنے کا حکم جاری کر دیا۔

چیف جسٹس ایس ایم عتیق شاہ نے نو منتخب وزیراعلیٰ سے حلف لینے کی درخواست پر سماعت کی اور تحریری حکم نامہ جاری کیا۔ عدالت نے ہدایت دی کہ ایڈیشنل ایڈووکیٹ جنرل گورنر کی دستیابی معلوم کریں اور کل ایک بجے تک عدالت کو آگاہ کریں۔

حکم نامے میں کہا گیا کہ درخواست سپیکر صوبائی اسمبلی اور دیگر ارکان نے آرٹیکل 255 کے تحت دائر کی، جس میں استدعا کی گئی کہ سپیکر یا کسی اور کو حلف لینے کے لیے نامزد کیا جائے۔

تحریری حکم نامے میں مزید ذکر کیا گیا کہ علی امین گنڈاپور نے اپنا استعفیٰ گورنر کو بھیجا، سہیل آفریدی 13 اکتوبر کو وزیراعلیٰ منتخب ہوئے، اور اپوزیشن کے دیگر ارکان نے بھی شیڈول کے مطابق کاغذات نامزدگی جمع کرائے۔

شیڈول 12 اکتوبر کو جاری کیا گیا، تمام امیدواروں کی پڑتال کی گئی، اپوزیشن لیڈر نے الیکشن پر اعتراض کیا، جسے سپیکر نے مسترد کر کے رولنگ دی۔ گورنر نے حلف کے لیے عدم دستیابی ظاہر کی۔

عدالتی حکم کے مطابق حلف میں مزید تاخیر صوبے کی حکمرانی کو متاثر کر سکتی ہے، اور ایڈیشنل اٹارنی جنرل کے مطابق آرٹیکل 255(2) کی کارروائی اس وقت نہیں ہو سکتی کیونکہ گورنر پاکستان میں ہیں اور 15 اکتوبر کو دستیاب ہوں گے۔