غزہ جنگ بندی کے بعد اٹلی فلسطین کو تسلیم کرنے کے قریب ہے، جارجیا میلونی

اٹلی کی وزیراعظم جارجیا میلونی نے کہا ہے کہ غزہ میں جنگ بندی معاہدے کے بعد ان کا ملک فلسطین کو بطور ریاست تسلیم کرنے کے پہلے سے کہیں زیادہ قریب پہنچ چکا ہے۔

مصر کے شہر شرم الشیخ میں امن کانفرنس کے دوران میڈیا سے گفتگو کرتے ہوئے میلونی نے کہا کہ "اگر یہ معاہدہ مکمل طور پر نافذ ہو گیا تو اٹلی کی جانب سے فلسطینی ریاست کو تسلیم کرنے کا فیصلہ یقینی طور پر قریب آ جائے گا۔"

انہوں نے واضح کیا کہ اٹلی فلسطینی ریاست کے قیام کی بھرپور حمایت کرتا ہے اور غزہ کے عوام کے لیے انسانی امداد کا سلسلہ جاری رکھے گا۔

میلونی نے مزید کہا کہ ان کا ملک غزہ میں امن و استحکام کے لیے عملی کردار ادا کرنے کو تیار ہے، اور اگر اقوام متحدہ کی قرارداد کے تحت ضرورت پڑی تو اٹلی اپنی کارابینیری فورس کو تعینات کرنے پر بھی غور کرے گا۔

ان کا کہنا تھا، ’’یہ ایک تاریخی لمحہ ہے، اور مجھے فخر ہے کہ اٹلی اس عمل میں ایک فعال کردار ادا کر رہا ہے۔‘‘