اسلام آباد: پارلیمنٹ سے منظور شدہ فنانس بل 2025-26 میں متعدد نئے اداروں کو ٹیکس چھوٹ کی فہرست میں شامل کر لیا گیا ہے، جنہیں پہلے سے اس سہولت کا فائدہ حاصل تھا یا اب کیا جا رہا ہے۔
تفصیلات کے مطابق نئی فہرست میں سابق صدرِ پاکستان اور ان کی بیوہ کی پنشن، اسٹیٹ بینک آف پاکستان، اسٹیٹ بینک بینکنگ سروسز کارپوریشن، ایف بی آر فاؤنڈیشن، پاکستان کونسل آف سائنٹفک اینڈ انڈسٹریل ریسرچ، اور واپڈا شامل ہیں۔
اضافی اداروں میں پاکستان ایگریکلچرل ریسرچ کونسل، واپڈا کے کارپوریٹ ادارے، وزیراعظم کا خصوصی فنڈ برائے دہشتگردی کے متاثرین، وزیر اعلیٰ (پنجاب) کا ریلیف فنڈ برائے خیبرپختونخوا کے بے گھر افراد (آئی ڈی پیز)، نیشنل ڈیزاسٹر رسک مینجمنٹ فنڈ اور سپریم کورٹ آف پاکستان شامل ہیں۔
اسی طرح دیامر بھاشا اور مہمند ڈیمز فنڈ، وزیراعظم کووڈ-19 ریلیف فنڈ 2020، نیشنل انڈومنٹ اسکالرشپ فار ٹیلنٹ، ایس ای سی پی، پرائیویٹائزیشن کمیشن، اور فوجی فاؤنڈیشن کو بھی ٹیکس چھوٹ دی گئی ہے۔
اس کے علاوہ آڈٹ اوور سائیٹ بورڈ، سپریم کورٹ واٹر کنزرویشن اکاؤنٹ، بلوچستان ایجوکیشن انڈومنٹ فنڈ، آرمی ویلفیئر ٹرسٹ، پبلک پرائیویٹ پارٹنرشپ اتھارٹی (ٹیکس سال 2022 سے اگلے چار سال تک)، وزیراعظم کے ریلیف فنڈ برائے قدرتی آفات، اور ایکسپورٹ امپورٹ بینک آف پاکستان بھی ٹیکس چھوٹ کے مستحق قرار دیے گئے ہیں۔
یاد رہے کہ پہلے ایف بی آر نے فلاحی اور غیر منافع بخش تنظیموں کو ٹیکس کریڈٹ کی سہولت دی تھی، مگر اب ان کے لیے براہِ راست ٹیکس چھوٹ کی پالیسی اختیار کی گئی ہے۔
فنانس بل 2025-26، صدر مملکت آصف علی زرداری کی منظوری کے بعد آج (پیر) سے باقاعدہ ایکٹ کی صورت اختیار کرے گا۔
دیکھیں
