اسلام آباد جوڈیشل کمپلیکس حملے کے سہولت کار اور ہینڈلر گرفتار، تحقیقات جاری

سکیورٹی اداروں نے وفاقی دارالحکومت میں جوڈیشل کمپلیکس پر ہونے والے خودکش حملے کے سہولت کار اور ہینڈلر کو گرفتار کر لیا ہے۔

 پولیس ذرائع کے مطابق سہولت کار گزشتہ ایک ماہ سے راولپنڈی میں مقیم تھا جبکہ ہینڈلر کو خیبرپختونخوا سے گرفتار کیا گیا۔ اب تک پانچ افراد کو حراست میں لیا جا چکا ہے۔

ذرائع نے بتایا کہ حملے سے قبل سہولت کار اور خودکش بمبار نے کمپلیکس کی متعدد بار ریکی کی تاکہ منصوبہ بندی مکمل کی جا سکے۔ گرفتار ملزمان کو نامعلوم مقام پر منتقل کر دیا گیا ہے۔ 

سہولت کار کو ڈھوک پراچہ کے علاقے سے گرفتار کیا گیا اور وہ راولپنڈی کینٹ کے اہم مقامات کی ریکی بھی کرتا رہا۔ دونوں ملزمان کو 40 گھنٹوں کے اندر گرفتار کیا گیا۔

وزیر مملکت برائے داخلہ طلال چوہدری کے مطابق خودکش بمبار افغانستان کا شہری تھا اور ابتدائی تحقیقات سے یہ بات سامنے آئی کہ وہ نہ تو پاکستانی زبان سمجھ سکتا تھا اور نہ پاکستانی کرنسی سے واقف تھا۔

 حملے کے دوران بمبار مختلف موٹر سائیکلوں پر حرکت کرتا رہا اور پاکستانی کرنسی میں کرایہ ادا کرنے میں دشواری پیش آئی۔

یاد رہے کہ اسلام آباد کی کچہری پر منگل کو ہونے والے حملے میں کم از کم 12 افراد جاں بحق اور 36 زخمی ہوئے۔