اسحاق ڈار کی یورپی یونین قیادت سے ملاقات، جی ایس پی پلس اسٹیٹس کے آئندہ جائزے پر اہم گفتگو

نائب وزیراعظم و وزیرِ خارجہ اسحاق ڈار نے برسلز میں یورپی یونین کونسل کے صدر انتونیو کوسٹا سے ملاقات میں جی ایس پی پلس اسٹیٹس کے رواں ماہ ہونے والے جائزے پر تفصیلی بات چیت کی۔

 جی ایس پی پلس کا درجہ پاکستان کو 2014 میں ملا تھا جس سے پاکستانی ٹیکسٹائل کی یورپی منڈی میں برآمدات میں 108 فیصد اضافہ ریکارڈ ہوا۔ اکتوبر 2023 میں یورپی پارلیمنٹ نے اس اسٹیٹس میں 2027 تک توسیع کی منظوری دی تھی تاکہ پاکستان ڈیوٹی فری یا کم ڈیوٹی پر تجارت سے فائدہ اٹھاتا رہے۔

ایران۔اسرائیل کشیدگی کے باعث جی ایس پی پلس کا مانیٹرنگ مشن جون سے مؤخر تھا، جو جلد پاکستان کی جانب سے 27 عالمی کنونشنز پر عملدرآمد کا جائزہ لے گا۔ ملاقات میں دونوں رہنماؤں نے تجارت، اقتصادی تعاون، علاقائی سیکیورٹی اور باہمی دلچسپی کے دیگر امور پر بھی گفتگو کی، جبکہ دوطرفہ تعلقات کو مزید مضبوط بنانے کے عزم کا اظہار کیا۔

دفتر خارجہ کے مطابق اسحاق ڈار تین روزہ دورے کے دوران پاکستان—ای یو اسٹریٹجک ڈائیلاگ کے ساتویں اجلاس میں حصہ لیں گے، جس میں 2019 کے اسٹریٹجک انگیجمنٹ پلان کے تحت تمام شعبوں میں تعاون کا جائزہ لیا جائے گا۔ 

یورپی یونین کے سفیر نے تازہ بیان میں کہا ہے کہ پاکستان کو جی ایس پی پلس کنونشنز پر مکمل عملدرآمد کے لیے “مزید اقدامات” کرنا ہوں گے۔