نجی اسکولوں کو مہنگی کتابیں و یونیفارم بیچنے پر کمیشن کا شوکاز نوٹس

مسابقتی کمیشن نے ملک کے 17 بڑے نجی اسکول سسٹمز کو شوکاز نوٹس جاری کر دیا ہے۔

 کمیشن کے مطابق یہ اسکول طلبہ کو مہنگی لوگو والی نوٹ بکس اور یونیفارمز خریدنے پر مجبور کر رہے ہیں۔ مارکیٹ میں لوگو والی کاپیاں عام قیمت سے 280 فیصد تک مہنگی ہیں اور والدین سستے متبادل خریدنے سے محروم رہ جاتے ہیں، جس کی وجہ سے وہ ’یرغمال صارفین‘ بن جاتے ہیں۔

کمیشن کا کہنا ہے کہ یہ مشروط فروخت کمپٹیشن ایکٹ کی خلاف ورزی ہے۔

 نجی اسکول ملک بھر میں ہزاروں کیمپس چلاتے ہیں اور لاکھوں طلبہ و والدین اس سے متاثر ہوتے ہیں، جبکہ نئے ایڈمیشن کے اخراجات اور سفری مشکلات کی وجہ سے اسکول تبدیل کرنا ممکن نہیں۔

اسی طرح ہزاروں اسٹیشنری اور یونیفارم فروش چھوٹے کاروبار بھی متاثر ہو رہے ہیں۔

کمیشن نے اسکولوں کو 14 دن میں تحریری جواب جمع کرانے کی ہدایت کی ہے اور کہا کہ خلاف ورزی کی صورت میں ساڑھے سات کروڑ روپے تک جرمانہ عائد کیا جا سکتا ہے۔