پاک–کینیڈا بزنس تعلقات مضبوطی کی جانب، ہائی کمشنر محمد سلیم کا بزنس کمیونٹی کے کردار پر زور

کینیڈا میں پاکستان کے ہائی کمشنر محمد سلیم نے کہا ہے کہ پاکستان اور کینیڈا کی معیشتوں کے درمیان رابطوں کو مضبوط بنانے میں بزنس کمیونٹی ایک مؤثر پُل کا کردار ادا کر رہی ہے۔

وہ پاکستانی نژاد کاروباری افراد کی تنظیم ’اوپن‘ کی سالانہ کانفرنس سے خطاب کر رہے تھے، جہاں ان کا کہنا تھا کہ ترقی کی جانب بڑھتے ہوئے پاکستان میں مختلف شعبوں میں تجارت اور سرمایہ کاری کے وسیع مواقع موجود ہیں۔

ہائی کمشنر نے یقین دہانی کرائی کہ پاکستان ہائی کمیشن اور کینیڈا کے تینوں قونصل خانے بزنس کمیونٹی کو پاک–کینیڈا اقتصادی تعلقات کو فروغ دینے کے لیے ہر ممکن تعاون فراہم کریں گے۔

کانفرنس میں ٹورنٹو میں تعینات قونصل جنرل خلیل باجوہ اور ٹریڈ اینڈ انویسٹمنٹ قونصلر التمش جنجوعہ نے بھی شرکت کی۔

’اوپن‘ کی اس سالانہ کانفرنس میں پورے کینیڈا سے 100 سے زائد پاکستانی نژاد سرمایہ کاروں، ایگزیکٹوز، پروفیشنلز اور کاروباری شخصیات نے شرکت کی۔