بلاول بھٹو زرداری کا عالمی برادری سے مطالبہ: فلسطین کے دو ریاستی حل کے لیے فیصلہ کن اقدامات ضروری

پاکستان پیپلز پارٹی کے چیئرمین بلاول بھٹو زرداری نے فلسطینی عوام سے یکجہتی کے عالمی دن کے موقع پر عالمی برادری پر زور دیا کہ وہ فلسطین کے دو ریاستی حل کے نفاذ کے لیے فوری اور فیصلہ کن اقدامات کرے۔

بلاول بھٹو نے کہا کہ فلسطین میں جاری مظالم اور ہر معصوم جان کے ضیاع، ہر گھر کے برباد ہونے کے واقعات انسانیت کے اجتماعی ضمیر پر گہرے زخم ہیں، اور دنیا کو انصاف، اخلاقی جرات اور ہمدردی کے ساتھ اپنا کردار ادا کرنا چاہیے۔

انہوں نے مزید کہا کہ پیپلز پارٹی ہمیشہ فلسطینی عوام کے ساتھ کھڑی رہی ہے اور فلسطینی عوام کے دیرینہ خوابِ آزادی کے پورا ہونے تک یہ حمایت جاری رہے گی۔

 بلاول بھٹو نے عالمی برادری پر زور دیا کہ وہ بین الاقوامی قوانین کی پاسداری یقینی بنائے اور فلسطین کے ساتھ یکجہتی صرف جذبات تک محدود نہ رہے بلکہ انصاف اور دیرپا امن میں بدل جائے۔