پاکستان نے ایل این جی کارگوز کی منتقلی کی منظوری دے دی، ایک ارب ڈالر زرمبادلہ بچنے کا امکان

اسلام آباد: پاکستان نے 2026 کے لیے ایل این جی کارگوز کی منتقلی کے اہم منصوبے کی منظوری دے دی ہے، جس کے نتیجے میں غیر ملکی زرمبادلہ میں تقریباً ایک ارب ڈالر کی بچت متوقع ہے۔

کئی ماہ کی غیر یقینی صورتحال کے بعد، پاکستان نے قطر اور اطالوی کمپنی ای این آئی کے ساتھ اپنا طویل انتظار کیا جانے والا سالانہ ترسیلی منصوبہ (ADP) منظور کرلیا ہے، جس کے تحت 35 ایل این جی کارگوز کو عالمی منڈی کی جانب موڑنے کی اجازت مل گئی ہے۔

حکام کے مطابق اس اقدام کا مقصد ملک میں گیس کی کم ہوتی طلب اور اضافی ایل این جی کی وجہ سے دباؤ کا شکار نظام کو مستحکم کرنا ہے۔

پیٹرولیم ڈویژن کے ایک سینئر عہدیدار کے مطابق، قطر طویل المدتی معاہدے کی نان پرفارمنس ڈلیوری (NPD) شق کے تحت پاکستان کی درخواست پر 29 میں سے 24 کارگوز عالمی مارکیٹ کی جانب منتقل کرے گا۔

این پی ڈی شق کے تحت:

• اگر کارگو عالمی منڈی میں معاہدے سے زیادہ قیمت پر فروخت ہو تو مکمل منافع قطر کو ملے گا۔
•  
• اگر قیمت معاہدے سے کم ہو تو نقصان پی ایس او برداشت کرے گی۔
•  

دوسری جانب اطالوی کمپنی ای این آئی پاکستان ایل این جی لمیٹڈ کے ساتھ طے پانے والے باہمی سمجھوتے کے تحت 11 کارگوز منتقل کرے گی، جس میں منافع اور نقصان دونوں مشترکہ طور پر تقسیم ہوں گے۔

حکومت نے واضح کیا ہے کہ وہ این پی ڈی کے تحت کارگوز موڑنے سے ہونے والے کسی نقصان کو خود برداشت نہیں کرے گی۔

قیمت کم ہونے سے پیدا ہونے والا مالی بوجھ براہ راست RLNG صارفین پر منتقل ہوگا، جن میں شامل ہیں:

• بجلی گھر
•  
• برآمدی صنعتیں
•  
• CNG سیکٹر
•  
• RLNG گھریلو صارفین
•  

عہدیدار نے مزید بتایا کہ ان تبدیلیوں کے باوجود، 2026 میں ملک میں گیس کے استعمال میں 400 MMCFD سے زائد کمی کے باعث پاکستان کے پاس 13 کارگوز اب بھی اضافی بچ جائیں گے۔