گوگل میپس میں بڑی اپ ڈیٹ، اب صرف نقشہ نہیں بلکہ بول کر معاون بھی

انٹرنیٹ ٹیکنالوجی کی بڑی کمپنی گوگل نے اپنی مشہور ایپ گوگل میپس میں اہم اپ ڈیٹ کر دی ہے، جس سے یہ صرف نقشہ نہیں بلکہ صارف کا معاون بھی بن جائے گا۔

اب صارفین موبائل ہاتھ میں لیے بغیر گوگل میپس سے صرف بول کر راستہ معلوم کر سکتے ہیں۔ مثال کے طور پر، آپ کہہ سکتے ہیں: "گوگل، قریب ترین ہسپتال دکھاؤ" یا "پٹرول پمپ دکھاؤ جس کے پاس پارکنگ ہو"۔

نقشہ ہدایات اب مشہور جگہوں یا عمارتوں کی بنیاد پر بھی دی جائیں گی، جیسے "تھائی سیام ریسٹورنٹ کے بعد دائیں مڑیں"، جس سے راستہ یاد رکھنا اور ڈرائیو کے دوران نیوی گیشن سمجھنا آسان ہو جائے گا۔

صارف راستے میں ٹریفک، حادثہ یا سڑک بند ہونے کی صورت میں بھی بول کر رپورٹ کر سکتا ہے، اور گوگل میپس فوری طور پر دیگر ڈرائیورز کو اطلاع دے گا۔

اس نئے فیچر کے فوائد میں زیادہ محفوظ ڈرائیونگ، مصروف یا غیر مانوس راستوں پر آسان نیوی گیشن، اور بروقت ٹریفک و حادثات کی معلومات حاصل کرنا شامل ہے۔

یہ فیچر فی الحال اینڈرائیڈ صارفین کے لیے دستیاب ہے اور جلد ہی آئی او ایس اور گوگل آٹو سسٹم میں بھی متعارف کروایا جائے گا۔