صدر زیلنسکی: یوکرین مشروط طور پر ڈونباس سے فوجی دستے واپس بلانے کے لیے تیار

یوکرین کے صدر ولادیمیر زیلنسکی نے کہا ہے کہ یوکرین مشروط طور پر مشرقی صنعتی علاقے ڈونباس سے اپنے فوجی دستے واپس بلانے کے لیے تیار ہے۔

صدر زیلنسکی کے مطابق، اگر روس بھی اپنی افواج واپس بلائے اور اس علاقے کو بین الاقوامی نگرانی میں غیر فوجی زون (ڈیمیلٹرائزڈ زون) قرار دیا جائے تو یوکرین اس اقدام پر غور کر سکتا ہے۔

صدر زیلنسکی نے صحافیوں سے بات چیت میں بتایا کہ امریکا نے ڈونباس میں آزاد اقتصادی زون قائم کرنے کی تجویز دی ہے، جسے ڈیمیلٹرائزڈ رکھنے پر بھی بات ہو رہی ہے۔

 تاہم اس زون کے انتظامی اور ترقیاتی معاملات کی تفصیلات ابھی سامنے نہیں آئیں۔

انہوں نے کہا کہ زاپوریژیا نیوکلیئر پاور پلانٹ کے اطراف بھی اسی طرز کا انتظام ممکن ہے تاکہ علاقے کو محفوظ بنایا جا سکے۔

 صدر زیلنسکی کے مطابق کسی بھی ممکنہ امن معاہدے کو یوکرینی عوام کے ریفرنڈم کے ذریعے منظور کرنا لازمی ہوگا۔