ایران میں مزید مظاہرین کی ہلاکت پر امریکا کا سخت ردعمل، ٹرمپ کی ’بہت زوردار‘ حملے کی دھمکی

واشنگٹن/تہران: امریکی صدر ڈونلڈ ٹرمپ نے ایران کو خبردار کرتے ہوئے کہا ہے کہ اگر جاری احتجاجی مظاہروں کے دوران مزید مظاہرین ہلاک ہوئے تو امریکا انتہائی سخت اور زوردار حملہ کر سکتا ہے۔

ایران میں مظاہرے دوسرے ہفتے میں داخل ہو چکے ہیں، جہاں مہنگائی، شدید معاشی بحران اور ایرانی ریال کی تاریخی گراوٹ کے باعث عوام سڑکوں پر نکل آئے ہیں۔

ایئر فورس ون میں صحافیوں سے گفتگو کرتے ہوئے صدر ٹرمپ کا کہنا تھا کہ واشنگٹن صورتحال پر گہری نظر رکھے ہوئے ہے اور اگر ایرانی حکومت نے مظاہرین کے خلاف طاقت کا استعمال جاری رکھا تو امریکا خاموش نہیں رہے گا۔

یہ احتجاج 28 دسمبر کو تہران میں دکانداروں کی ہڑتال کے بعد شروع ہوئے تھے، سرکاری اعداد و شمار کے مطابق اب تک کم از کم 12 افراد، جن میں سکیورٹی اہلکار بھی شامل ہیں، ہلاک ہو چکے ہیں۔

تجزیہ کاروں کا کہنا ہے کہ موجودہ مظاہرے حجم اور شدت کے اعتبار سے گزشتہ کئی برسوں کے سب سے بڑے عوامی احتجاج ہیں، جو 2022-23 میں مہسا امینی کی ہلاکت کے بعد شروع ہونے والی تحریک سے بھی زیادہ وسیع ہیں۔