قومی اسمبلی کے اسپیکر ایاز صادق نے وفاقی وزیر دفاع خواجہ آصف کی جانب سے اسپیکر اور چیئرمین سینیٹ کی تنخواہوں میں اضافے پر تنقید پر وزیراعظم شہباز شریف کو خط لکھ دیا ہے۔
ذرائع کے مطابق خط میں ایاز صادق نے واضح کیا ہے کہ اسپیکر اور ڈپٹی اسپیکر کی تنخواہیں بڑھانے کا فیصلہ ان کا نہیں بلکہ وفاقی کابینہ اور وزیراعظم کا اختیار ہے، اور اس فیصلے سے ان کا کوئی تعلق نہیں۔
ایاز صادق نے خط میں لکھا کہ وزیراعظم چاہیں تو ان کی تنخواہ میں اضافہ نہ کریں، انہوں نے اپنی تنخواہ سے متعلق فیصلہ وزیراعظم پر چھوڑ دیا ہے۔
ذرائع کے مطابق اسپیکر نے خواجہ آصف کے الزامات کا براہِ راست جواب دینے سے گریز کیا ہے۔
واضح رہے کہ خواجہ آصف نے ایک دن قبل سوشل میڈیا پر اسپیکر، چیئرمین سینیٹ اور دیگر اعلیٰ عہدیداروں کی تنخواہوں اور مراعات میں اضافے کو "مالی فحاشی" قرار دیتے ہوئے اسے قومی خزانے کا استحصال کہا تھا۔
ان کا کہنا تھا کہ حکومتی عہدیداروں کو عام آدمی کی مشکلات کا ادراک ہونا چاہیے کیونکہ ہماری تمام عزت، اختیار اور حیثیت عوام کی مرہون منت ہے۔
دیکھیں
